SOPB udah ngemujurka program CSR ‘Vision Care Project’ ba Rh Buli Anak Jamit
MIRI: Sarawak Oil Palms Berhad (SOPB) baru udah nembuka siti agi program Tanggungpengawa Rama Korporat (CSR) ‘Vision Care Project’ ti udah diatur kena bedau lama udah ba Rumah Buli Anak Jamit, Sungai Semanok, Tatau.
Projek CSR tu, iya nya program ditetapka SOPB ngaul rumah panjai besemak ngelingi ba operasyen raban sida ke bekerejasama enggau Opis Mengeri Pengerai nengah kaul ari Klinik Pengerai Jepak enggau Sepital Besai Bintulu, nengah sukung ari SpecShop.
“SOPB Vision Care Project iya nya projek CSR ninting taun ti udah ditumbuh dalam taun 2013 enggau tuju deka meri penyedar pasal pengerai enggau kualiti idup.
“Tuju SOPB mega deka ngurangka risiko buta ti tau diseliah, kelebih agi ngagai orang ke tuai ba rumah panjai ti suah nadai utai kena nerima perubat enggau jampat,” ku iya ba penerang berita kemari.
Projek udah ngaul semilan buah rumah panjai besemak enggau ladang SOP Kuala Tatau ba Kuala Tatau ti nyereta projek beperesa mata.
Ari 105 iku ti rejista bepere- sa mata, 103 ari sida udah dikelala begunaka cheremin mata lalu 15 iku agi deka nampung perubat ba Klinik Mata di Sepital Bintulu.
Antara bala ke bisi datai ba atur program nya, Menijar Ladang SOP Kuala Tatau 1 enggau 2, Budut Tumbai enggau Benedict Baja Malila sereta mega personnel ari Opis Kaul Mensia Mayuh, Opis Akaun enggau ladang ti udah gawa ngerumban sebulan sebedau program nentika pemujur atur program nya.
Siku ari tuai rumah, Tuai Rumah Buli Jamit, mega ngena awak nya meri terima kasih ngagai SOPB enggau raban perubat ari Opis Menteri Pengerai ti udah gerah jari nyendiaka pengawa beperesa mata sereta mega melanja cheremin mata enggau beputung ngagai sida ti bisi penanggul meda.
Vision Care Project iya nya siti ari mayuh macham projek CSR SOPB nyengkaum Young Achiever Awards (YAA), Students Adoption Programme (SAP) enggau SOPB-Get Equip’d Rehabilitation Programme ti udah nyadi peransang ngagai SOPB ngerembai begulai enggau komuniti menua nya.