Perintah besai dikearapka meri belanja tambah dikena mutar isu sekula repuk
KUCHING: Opis Menteri Pelajar, Sains enggau Pansik Teknologi agi sereta tetap ngarapka perintah besai Pakatan Harapan deka meri agih belanja tambah RM1 bilion dikena mutarka isu sekula tuai sereta repuk di Sarawak.
Menteri Pelajar, Sains enggau Pemansik Teknologi, Dato Sri Micheal Manyin Jawong madah, laban opis menteri deka terus chakah mekuh ngagai pengawa ngangkatka pemanah infrastruktur sekula kelimpah ari beratka kualiti pengajar enggau kepala pengajar.
Ku iya, laban ari 1,457 buah sekula di nengeri tu bisi 1,020 buah sekula dalam status sekula tuai sereta udah repuk.
“Perintah sebedau tu, dikena nambahka agi belanja ke udah bisi, udah ngemendarka penyampau RM1 billion dikena mutarka isu sekula tuai sereta repuk ungkup taun 2018 enggau 2019. Ungkup belanja tu ari baruh RMK11.
“Ke pemanah sekula di Sarawak, kitai agi ngarapka perintah besai ke diatu Pa- katan Harapan deka ngagih RM1 bilion belanja tambah.
“Dikena ngenyampatka pengawa ngemanah sereta ngaga baru sekula kitai, Kepala Menteri mega bisi nulis surat ngagai Menteri Wang Lim Guan Eng kena 1 Ogos 2018 pasal perintah nengeri ngenataika pinta ngagai perintah besai sepenyampau RM1 billion ngambika penanggul sekula tuai sereta repuk di Sarawak ulih diputar enggau lengkas.
“Taja pia, naka ke diatu kitai nadai udah nerima sebarang timbal ari Menteri Wang,” ku iya dalam aum pengarang berita.
Pekara ti sama nya mega disebut Manyin lebuh nyimpul jurai Opis Menteri Pelajar, Sains enggau Pansik Teknologi ba aum hari kK-7, Aum ke-2 penggal ke-3 DUN ke-18 ba Begunan DUN ditu, kemari.
Nambahka nya lebuh ngenang pekara ti sama dalam aum pengarang berita ba Bilik Media, Begunan Kunsil Nengeri ditu, kelimpah ari nganti belanja ari perintah besai, Manyin madahka dikena nyapai nya perintah nengeri ngagihka belanja kediri empu ke tuju pekara nya.
Iya madahka opis menteri iya terus mekuh ngagai pengawa ngemanhka infrastruktur 1,020 buah sekula ke udah tuai sereta repuk di nengeri tu.
“Kitai nguji enggau naka ulih mekuh baka ni deka ngangkatka pemanah gaya sekula, laban tu deka meri empas ngagai semua pemutus penyulut nembiak.
“Kitai deka mekuh ngagai infrastruktur sekula enggau kualiti pengajar enggau kepala pengajar,” ku iya dalam aum pengarang berita.
Bekaul enggau pekara ti sama, Manyin maya nyimpul jurai sereta aum pengarang berita madahka dibaruh perintah besai sebedau tu ngagiahka RM419 juta nengah Bajet 2018 dikena ngemanah sereta ngaga baru sekula tuai sereta repuk, tang agih belanja nya semina chukup ungkup 116 ari 1,020 buah sekula tuai sereta repuk .
“YB Chong Chieng Jen (DAP-Kota Sentosa) nanya nama kebuah agi 1,020 buah sekula tuai repuk? Laban naka ke diatu nadai sekula nya (ke udah tembu) diserah ngagai Opis Pelajar Nengeri lalu pia mega Certificate of Practical Completion (CPC).
“Tang kitai enda naka nya aja, ari 116 buah sekula nya (dalam Bajet 2018) semina 67 buah udah tembu lalu ke bukai bedau,” ku iya.
Kelimpah ari nyendiaka kandang endur belajar sereta ngajar ti kondusif, pengawa ngemansang sereta ngangkatka kapasiti enggau kapabiliti pengajar sereta kepala pen gajar mega dipejalaika dikena ngangkatka penyulut nembiak, ku iya.
Berindik ari pekara nya opis menteri sereta Opis Pelajar Nengeri Sarawak ngatur inisiatif program baka ‘Bengkel Memperkasa Pengurusan dan Kepimpian Sekolah Rendah Negeri Sarawak; Train the Trainers (ToT)’ Program ungkup 37 iku pengajar Sains serata Sarawak enggau Simposium Jaku English 2.0 Sarawak.
“Semua inisiatif program tu dipelanja perintah nengeri,” ku iya.
Nambahka nya lebuh ditanya bekaul enggau kerejasama opis menteri iya enggau Opis Pelajar Malaysia ( KPM), Manyin madahka kededua piak sepenemu pekara pelajar enda patut dipolitikka.
Nitihku iya kerejasama kededua pia bejalai enggau lanchar sereta nadai penanggul.
“Lebuh kitai betemu enggau menteri pelajar, kededua piak bepenemu pekara pelajar enda patut dipolitikka,” ku iya dalam aum pengarang berita.
Sama bisi dalam aum pengarang berita nya kemari, Menteri Muda Sains enggau Pansik Teknologi Dr Annuar Rapaee, Sekretari Mendam Opis Menteri Datu Sudarsono Osman enggau Sapit Mendam Opis Menteri Dr Abdul Rahman Deen.