KPDNHEP udah meresa 2,839 palan bebeli barang di selampur Sarawak Operasyen tu dipejalai maya SKHBMP Deepavali 2018 ti berengkah 3-9 November
SIBU: Opis Menteri Dagang Entara Menua enggau Pekara Bebelika Barang (KPDNHEP) udah meresa 2,839 palan bebeli barang di selampur Sarawak ti mega nyadi sebengkah ari operasyen dikena nentuka semua pedagang nitihka atur Skim Kawalan Harga Barang Musim Perayaan ( SKHBMP) Deepavali 2018.
Sapit Direktor KPDNHEP Sarawak Md Nawawi Ab Rahman madah, sida udah nangkap siti kes bekaul ngetanka rega barang maya skim nya udah dipejalai berengkah 3 nyentuk ke 9 November.
“Kes tu iya nya ari 630 palan bebeli barang di Kuching ti udah ngelanggar atur ari baruh Order 2(1) of the Price Control and Anti-Profiteering (Price Marking of Price Controlled Goods) Order (No.3) 2018.
“Pedagang nya udah ditinggang ukum RM100 lalu barang ti udah ditan iya nya berega sepenyampau RM600. Kelimpah ari nya, nadai kes ti sebaka nyadi di kandang menua bukai,” ku iya bejaku kemari.
Ku Md Nawawi ke mega ketuai pemesai meresa barang KPDNHEP nengeri, enti nitihka bagi menua, 274 palan bebeli barang udah diperesa di Sibu, Miri (140), Limbang (142), Lawas (72), Bintulu (344), Sri Aman (301), Kapit (310), Sarikei (443) sereta Mukah (183).
Maya timpuh meresa, barang ti dijaga ke udah ditikika rega deka nerima ukum ari baruh Akta Kawalan Harga dan Anti-Pencatutan 2011.
Maya timpuh SKHBMP dipejalai, individu ke ngelanggar atur rega barang deka ditinggang ukum RM100,000 tauka dijil sepengelama tiga taun, tauka kededua nya sekali tauka nerima kompaun lebih ari RM50,000.
Ungkup kompeni ke udah ngelanggar undang-undang nya deka nerima ukum RM500,000 tauka kena kompaun lebih ari RM250,000.
Ungkup sida ti bedagang ke enda ngengkahka tanda rega chura kalas ba barang ti dijaga, individu deka nerima ukum RM10,000 tauka lebih, tauka kompaun RM5,000 lalu ungkup kompeni deka nerima ukum RM20,000 tauka lebih tauka kompaun RM10,000. MIRI: Program radio bagi Iban Mirifm enggau kerejasama NAIM Group Of Companies deka ngatur program Panggau Krismas 2018 ‘Sehati@RTM’ kena 16 November tu ba Permymall Miri.
Menijar Stesyen RTM Miri, Zaidi Bujang madahka program ninting taun Bagi Iban Mirifm deka berengkah urung puluk 5 lemai nyentuk pukul 9.30 malam.
Iya deka dikeluarka Pengatur Bagi Iban Mirifm Bana Jimbat, pengeluar program Begulai Dj Desmond Surai nyadi Penulung Pengeluar.
Program pentas rikod pengelama 60 minit nya deka dirikod sereta dikeluar kena 25 Disember 2018, ditabur nengah WAIfm MIRI enggau WAIfm Kuching.
Program Panggau Krismas nyadi panggau pemerindang ti mai raban artis tebilang Iban baka Alexander Peter, Sylvia Banyie, Dominic Christy Dom enggau Leena Ranez.
Bela deka diatur iya nya pemerindang ‘Christmas Carol’ ari raban koir Gerija Mater Dei Lutong ti deka nyadaka lagu Krismas.
Pengawa ngatur Pentas Krismas 2018 Sehati@ RTM tu mega seriris enggau juluk RTM deka ngaul semak bala peninga enggau program dikeluarka RTM Miri (Bagi Iban) setipak enggau rambai jaku “Begulai Sejalai”.
Kelimaph ari nya, iya mega nguing ngagai kaul komuniti RTM kelebih agi RTM Miri enggau bala artis dikangau sereta bala peninga ngemujurka konsep ‘Visual Radio’ Pentas Krismas 2018.
Berindik ari nya, iya nesai mensia mayuh sampal datai ngerichahka agi Pentas Krismas 2018 Sehati@ RTM.
Kes tu iya nya ari 630 palan bebeli barang di Kuching ti udah ngelanggar atur ari baruh Order 2(1) of the Price Control and Anti-Profiteering (Price Marking of Price Controlled Goods) Order (No.3) 2018. Md Nawawi Ab Rahman Sapit Direktor KPDNHEP Sarawak