Pengawa bepilih ketuai dalam PKR enda diatur baru

SIBU: Komiti Pengawa Bepilih Besai Parti Keadilan Rakyat (PKR) udah ngaga pemutus nentuka pengawa bepilih ketuai dalam PKR pampang Julau enda diatur baru.

Chairman JPP PKR Dato Rashid Din madah, sebedau pemutus digaga komiti sida udah ngatur aum bekaul enggau pekara nya sereta diberi penerang ari Unit Operasyen, Unit Sistem enggau IT kelimpah beratika ripot teknikal ari piak pemansang sistem e-undi, kilah ensana.

“Pemutus tu digaga bepun ari pansik penyampau undi ti madahka semua data likun kelimpah mujur disimpan ba sistem (cloud) taja pan bisi aplikasyen e-undi ba enam unit ‘tablet’ udah diberesi ‘Prey Anti-Theft’.

“Undi mega dirikod sereta dipansik chara teknikal mandangka nadai undi tinggal lalu pemutus undi nya kebendar iya ulih dikena,” pia ku iya nengah penerang media, kemari.

Berindik ari pekara nya, Rashid madah, pemutus pengawa bepilih ketuai dalam PKR pampang Julau deka dipandangka ba www.pemilihankeadilan 2018.com enda lama agi.

Pemutus pengawa bepilih ketuai dalam PKR pampang Julau ditanka dulu ketegal dipelabaka tablet ke dikena maya nya bisi kena dikeruga.

Pengawa bepilih tu diatur ba Kompleks Sukan Julau kena hari Enam tadi.

Ketegal pekara nya nyadi, bisi madahka pengawa nya deka diatur baru nyengkaum chalun Ketuai Pampang Parti dia, Larry Sng, empai lama, melabaka pengawa nya diatur baru hari Tiga tauka hari Empat tu.

Jaku iya ke dibantai nengah facebook tu bela minta kasih ngagai bala pengundi nurun baru nyema pengawa bepilih diatur baru.

Ba chalun Sapit Presiden PKR, Rafizi Ramli, iya bisi pengirau enti pengawa bepilih diatur sekali agi.

Iya nangika raban parti lebih agi sida ke diau ba menua pesisir enda ulih nurun baru.

Ba pekara bekaul sebedau tu mega, siku pengereja pengawa JPP PKR ditan polis ba Padang Bilun Sibu dikena nyaup mansik kes di Julau nya.

Iya ditan bepun ari siti ripot polis ke digaga Exco perintah nengeri Selangor, Rodziah Ismail.