Devices Hybrid, MARC dipilih nyadi champion AIM 2018
MIRI: Tim Devices Hybrid ngarika Bomba Zon 6 Miri enggau Miri Amatuer Radio Club (MARC) ke ngempu projek ti diberi nama ‘Search and Rescue Management System version 2’ udah dipilih nyadi champion Minister of Innovation Award (AIM) 2018, ti diatur Opis Menteri Pengawa Berumah enggau Kaunsil Kandang Menua (KPKT) 2018 ba Putra Jaya Kuala Lumpur apin lama ke udah.
Tim nya nerima RM5,000, trofi enggau setipikit.
Tim Devices Hybrid mega menang penuduk lumur satu ba kategori Innovative and Creative Group Award (KIK) 2018.
Sida nerima RM3,000 eng- gau setipikit.
Ketuai Opis Bomba enggau Penyah Penusah Zon 6 Miri, Law Poh Kiong madahka tim tu udah bekau ke alah dua taun ke udah, ngambi bagi ba pekit KIK ke lapan ba Malaysia dua taun ke udah lalu nadai kala putus pengarap nyentuk ke sida menang taun tu.
Iya meri puji ngagai tim Devices Hybrid ti ngarika Bomba Zon 6 Miri enggau MARC ti datai ari mayuh bengkah penatai lalu ulih gawa begulai sereta nempa siti sistem ti ulih mantu pengawa Ngiga enggau Nyelamat ( SAR) nyengkaum mantu Bomba enggau manah.
“SAR MS version 2 iya nya komunikasyen enggau sistem komputer ulih dikena maya SAR ba kandang menua ulu,” ku Law kemari.
Berebak enggau nya, Chairman MARC, Lo Kiun Sin madahka sistem tu ulih nyilih gambar taja ba luar bungkur arus penyambung.
Ku iya, chara ngena mudah agi dibanding enggau sistem komunikasyen bukai.
Ba kategori AIM 2018, bisi 49 tim nganjung penyereta ari serata menua lalu ba kategori KIK 2018, bisi 14 tim bepekit nyengkaum 8 tim Bomba ari serata menua.
Sekretari Besai Opis Menteri Pengelantang Mengeri, Pengawa Berumah enggau Kaunsil Kandang Menua Dato Sri Mohammad Mentek udah nyuaka tanda basa nya.