Sebarang isu ti bekaul jalai pengarap ke dikerembaika ba media rama patut dikenataika ngagai UNIFOR

KUCHING: Mensia mayuh ke bisi meda isu ti bekaul jalai pengarap sekalika manah tauka enda ke dikerembaika ba media rama, patut mai pekara nya ngagai Unit Pekara Jalai Pengarap Bukai (UNIFOR).

Sapit Kepala Menteri, Datuk Amar Douglas Uggah Embas madah, UNIFOR nyadi pelasar endur ngenatai sereta mutarka isu bekaul enggau jalai pengarap ukai Islam, awakka enda saru penemu.

Ku iya, UNIFOR pelasar jalai pengarap ukai Islam duduk sereta berandau baka ni kitai ulih nyingkang, ngemansangka tetiap jalai pengarap sereta baka ni ulih mai penyerakup ngagai Sarawak.

“Tu pelasar alai kitai ulih begulai enggau pangan diri nyengkaum enggau raban Islam, kitai berandauka isu ke nyadi ngambika kitai ulih nyeliahka penyaru penemu.

“Saru penemu tu ulih digaga, kelebih agi diatu rentayan moden ke nyadi medium ke chukup kuat alai kitai bulih berita manah sereta dalam timpuh ke sama bekunsika jaku ti ngasuh saru enggau nyadi batu api.

“Nya alai aku minta ngagai mensia mayuh, nyema bisi meda enda ngira nama isu bekaul dalam internet, seliahka ari terus nyaut tang bai ngagai UNIFOR, ditu kitai duduk sereta ngulihka penerang silik pasal isu nya,” ku iya.

Uggah ke nyadi menteri nyaga UNIFOR mansutka pekara nya lebuh bejaku ba pengawa merekat opis baru UNIFOR ba Wisma Satok ditu, kemari.

“Nyema isu nya patut dibai ngagai perintah, aku ngarika kitai mai nya ngagai opis ke bekaul ngambika meda isu nya lalu deka mutarka iya.

“Enda ngira nama pen- anggul sekalika isu angat ari seberai kitai deka berandauka nya,” ku iya ti mega Menteri Betanam Betupi Moden, Tanah Adat enggau Pemansang Kandang Menua.

Taja pia, iya madahka nengeri tu dalam pemaik enggau pengelantang, ambika chunto ba nengeri tu nadai penanggul ngena leka jaku ‘ Allah’ kelimpah ari rumah sembiang digaga besemak enggau pangan diri enda ngira jalai pengarap.

Berebak enggau tu mega, Uggah bisi ngenang baru ma- dahka kabinet nengeri udah ngemendarka tanah perintah pemesai tiga ekar endur ngaga Kompleks UNIFOR ti bepalan ba Jalan Ong Tiang Swee, sereta pasal perintah nengeri ti udah ngemendarka penumbuh Sarawak Unit for Other Religions Charitable Trust kena 29 Mac taun, tu enggau juluk ngemata sereta ngintu pengelantang ari baruh UNIFOR.

“Diatu kitai bisi Unit Trust, baka ni kitai deka ngiga belanja tambah ke komplek nya, engka kitai patut bejalaika aktiviti dikena ngiga belanja,” ku Uggah.

Kelimpah ari nya dalam jaku pengelalu, Direktor Datu Dr Ngenang Janggu lebuh ke ngenang pasal opis baru sementara nya, iya madahka UNIFOR pindah ngagai Wisma Satok kena 1 November 2018.

Dalam timpuh dua taun sebedau tu ku iya, UNIFOR bepalan ba Begunan Masja iya nya bekunsi enggau Opis Menteri Betanam Betupi Moden, Tanah Adat enggau Pemansang Kandang Menua.

“Taja pia, tu opis sementara ti dikemendarka disuwa dalam timpuh tiga taun. Nya kebuah kitai amat ngarapka kompleks UNIFOR ulih tembu dalam timpuh nya.

“Lalu naka ke diatu kami bisi 20 iku pengereja pengawa, ke alai bisi 12 iti agi puang,” ku iya.

Sama bisi datai ngagai pengawa merekatka opis baru sementara UNIFOR, iMenteri Kaunsil Kandang Menua enggau Pengawa berumah Datuk Prof Dr Sim Kui Hian, Menteri Muda Bekal Ai Datuk Liwan Lagang, Menteri Muda Pemansang Tanah Datuk Roland Sagah, Menteri Muda Kaunsil Kandang Menua Datu Dr Penguang Manggil enggau bala ketuai sembiang ke ukai Islam.

— Gambar Chimon Upon MEREKAT: (kiba) Ketuai Bishop Gerija Roman Katolik Simon Poh nguluka pengawa sembiang merekatka opis baru sementara UNIFOR ba Wisma Satok ke digulu Uggah enggau Ngenang sereta ke bukai, kemari.

— Gambar Chimon Upon MERINDANG: Abang Johari nyada ke lagu begulai enggau bini iya Datin Patinggi Dato Juma’ani Tun Tuanku Bujang ba pengerami Makai Lemai Sarawak Backbenchers di Kuching, malam ensanus. Sama bisi dipeda dia Asfia, Menteri Muda Hal Ehwal Korporat, Abdullah Saidol, Sapit Speaker DUN, Dato Gerawat Gala enggau Paulus.