UNIFOR nerima RM30 juta ungkup taun 2019
KUCHING: Unit Pekara Jalai Pengarap Bukai (UNIFOR) nerima agih belanja RM30 juta ungkup taun 2019, ari perintah nengeri.
Sapit Kepala Menteri ti mega menteri ke nyaga UNIFOR, Datuk Amar Douglas Uggah Embas madahka agih belanja nya udah dikemendarka YAB Kepala Menteri Datuk Patinggi Abang Johari Tun Openg.
“Sehari tu (kemari) aku deka madah iya nya YAB Kepala Menteri udah ngemendarka agih belanja RM30 juta ngagai UNIFOR ungkup taun 2019,” ku iya seraya madahka pekara nya ti nadai disebut maya nyimpul jurai Opis Menteri Betanam Betupi Moden, Tanah Adat enggau Pemansang Kandang Menua ba hari kepenudi aum Kunsil Nengeri ensanus.
Uggah ke nyadi Menteri Betanam Betupi Moden, Tanah Adat enggau Pemansang Kandang Menua madahka berita agih belanja nya lebuh ke bejaku nyerumba pengawa merekat opis baru UNIFOR ba Wisma Satok ditu, kemari.
UNIFOR ditumbuhka kena 27 April 2017, iya nya asil penemu niang Pehin Sri Adenan Satem maya ke nyadi kepala menteri, ti diengkah ari baruh Opis Kepala Menteri.
Batang pengawa UNIFOR iya nya nyaga jalai pengawap bukai (enda nyengkaum Islam) ba nengeri tu baka ngaga rumah sembiang.
Uggah madahka diri temegah ati enggau penyampau agih belanja ke diberi ngagai UNIFOR kenyau ari ditumbuhka taun dalam 2017, ti majak nambah.
Iya arapka taun ke bukai penyampau agih belanja nya deka majak nambah dikena mantu rumah sembiang ke ukai bepengarap Islam di serata nengeri tu.
“Ba taun 2017 UNIFOR diagihka RM15 juta, lalu bisi nambah ba taun 2018 iya nya RM20 juta lalu diatu nambah baru ngagai RM30 juta (2019).
“Aku arap bendar pengudah bulih asil chukai nyual produk petroleum, ba taun 2020 ila kitai engka minta RM50 juta,” ku iya.
Dalam Bajet Negeri 2019, Abang Johari madahka Sarawak deka bejalaika chukai nyual produk petroleum 5 peratus berengkah Januari 2019.
Kelimpah ari nya, lebuh ke ngenang pasal UNIFOR maya nyimpul jurai opis menteri nya ensanus,Uggah madahka sepenyampau RM15 juta udah dikemendarka ba taun 2017 dikena ngaga, nyeruri enggau ngemanahka 77 buah rumah sembiang.
Ari penyampau nya (77 buah), 25 projek udah tembu lalu laluh 52 projek agi dalam mayuh renggat dipejalaika.
Berebak enggu nya, iya mega madahka perintah nengeri deka meda penemu nyadika UNIFOR nyadi opis penuh.
Taja pia perintah nengeri apin lama udah ngemendarka 15 iti pangku pengawa baru Pangku Pengawa ti Bepelasarka ‘Caruman’ (JBC) dikena nambahka 17 iti pangku pengawa JBC ke dulu ari tu, lalu dikena ngenegapka batang pengawa enggau kapasiti UNIFOR.