Ungkup dalam bajet nengeri diberi ngelui 10 bilion berengkah taun baru
KUCHING: Kepala Menteri, Datuk Patinggi Abang Johari Tun Abang Openg ngenukuka Sarawak deka seruran ngungkupka lebih RM10 bilion dalam bajet nengeri berengkah ari taun baru.
Ku iya, belanja nya diulih ari mayuh bengkah pemansut nyengkaum asil dividen ari Malaysian LNG Tiga Sdn Bhd (MLNG Tiga) ke diatu ke ngempu 25 peratus.
Sebedau tu ku iya, Sarawak ngempu10 peratus dalam MLNG Tiga tang nambah ngagai 25 peratus pengudah ke meli ari Shell Malaysia Berhad dalam April taun tu.
“Taun nyin tadi, kitai bulih dividen ari MLNG Tiga sepenyampau RM800 juta. Taja pia, taun baru kitai deka bulih dividen ngelui RM2 bilion asil ari ti dipemisi nya.
“Reti iya, nengah pemisi nya Sarawak deka ngembuan penatai pemisi tambah ti ulih mantu diberi ngagai ungkup belanja ti ngelui RM10 bilion dalam bajet nengeri udah tu ila.
“Ungkup belanja nya deka dikena ngemansangka menua pesisir enggau tebing pantai ungkup pelasar perengkaguna baka jalai alun, ai enggau elekterik,” ku iya.
Iya madah munyi nya lebuh bejaku ba pengerami Makai Lemai Sarawak Backbenchers ti berambaika jaku ‘Sayang Sarawak’ ke diatur Sarawak Backbenchers Club di sebuah hotel ke tebilang ditu,malam ensanus.
Berebak enggau nya, Abang Johari meri terima kasih ngagai sukung Kaban Kunsil Nengeri (ADUN) ti udah mantaika mosyen numbuhka Komiti Konsultatif Sempekat Malaysia 1963 (MA63) maya Aum Dewan Kunsil Negeri (DUN) ke sebedau tu.
Ku iya, mosyen nya digaga berindik ari Komiti Pemandu MA63 ba renggat perintah besai ti semina diarika dua iku aja ari Sarawak enggau Sabah.
“Nya alai, aku madah ngagai Speaker DUN, Datuk Amar Mohd Asfia Awang Nassar ke alai kitai patut bisi komiti kediri empu ti nyadi referen sereta meri lalau ba pengawa ngambi pulai hak MA63 ti majak lenyau.
“Aku meri terima kasih ngagai sukung kita (ADUN) ke mosyen nya ti mayuh ngaul pekara bekaul enggau undang-undang,” ku iya.
Sama bisi ngulu pengerami nya, dua iku Sapit Kepala Menteri iya nya Datuk Amar Douglas Uggah Embas enggau Tan Sri Datuk Amar Dr James Jemut Masing, Asfia, bala menteri kabinet nengeri, bala menteri muda, Chairman Sarawak Backbenchers Club, Paulus Palu Gumbang ke mega ADUN Batu Danau nyengkaum pengari rayat ke bukai.