Chalun PKR Julau bedau nerima pemutus pengawa bepilih PKR
KUCHING: Chalun ke bediri minta pilih ba pengawa bepilih Parti Keadilan Rakyat ( PKR) Julau nadai udah nerima sebarang pemutus ungkup pampang sida ti udah diatur kena 10 November, Hari Enam.
“Aku enda nemu pemutus. Sida nadai madah ngagai aku. Aku mega enda nemu berapa penyampau tubuh pengundi Hari Enam nyin tadi. Aku melabaka urung 1,800 iku,” ku penyandang Ketuai PKR Julau, Semana Sawang madah ngagai The Borneo Post onlinelebuh dikerandau.
Semana ti mega chairman pampang PKR Julau kenyau ari taun 2010 udah disatup MP Julau, Larry Sng lebuh bepilih ke sekali tu.
Semana nyemetak madahka iya enda pechayaka sistem eundi lalu madahka sida udah salah guna sekeda raban ke penguntung sida empu.
“Bepilih baru tauka enda, tu nadai sebarang bida ba aku. Aku endang enda pechayaka sistem e-undi tu. Sida udah ngachau tablet ti dikerinduka sida,” ku iya.
Lebuh dipinta nerangka jaku iya, Semana madahka iya empu udah ngasaika pemar ngundi ngena sistem e-undi lalu sebanaka mayuh agi penusah ditapi sida ke tuai.
“Aku nadai mayuh tubuh enggau besaup matau pekara ti nyadi, nya alai lebuh peranak menua tauka sida ke tuai napi pemar tauka enda nemu baka ni deka ngundi, bala staf JPP deka ngundi lalu ukai pengundi nya empu,” ku iya.
Taja pia ku Semana, iya enggai ngaga sebarang sebana tauka ningkah agi pasal sebarang pemutus ari bepilih laban bala ketuai PKR Sarawak empu udah ningkah ba renggat tetinggi, tang nadai atur udah dipejalai.
“Aku semina orang mit aja. Orang ti tuai agi ari aku udah bejaku sereta ngaga ripot pasal isu tu tang nadai atur dipejalai. Aku enda mikir sida deka mendingka jaku aku,” ku iya asa.
Lebuh ditanya pasal bukti ti dianjung ngagai Komiti Nagang Pengawa Makai Suap Malaysia (MACC) pasal ngelaban pengawa meli undi enggau makai suap, ku Semana, iya puntan penemu pasal bukti ti dianjung dalam ‘thumb drive’.
“Aku ninga nya dalam video, lalu nya aja pekara ditemu aku. Aku enda meda enggau mata aku empu, tang ninga nya nengah video ari orang ti nerima duit pengudah sida ngundi,” ku iya.
Semana ngarapka MACC deka mansik silik kes nya lalu bejalaika atur ti patut ngagai sida ti ngereja penyalah.
“Aku dipadah bala diri empu ke alai Jalai Julau-Entabai sekut nyauka dua jam pengudah pengawa ngundi laban mensia mayuh ngelawa rumah ba jalai nya ngambi duit,” ku iya.