Penanggul trafik ba Kota Samarahan meseti teputar, anang betangguh
KUCHING: Kota Samarahan diatu majak mansang lalu meseti digaga besambung manah enggau Mengeri Kuching.
Chairman Kaunsil Mengeri Kota Samarahan, Dato Peter Minos madah nyema mengeri mit baka Kajang enggau Klang ulih disambung manah ngagai Mengeri Kuala Lumpur nengah jalai besai sereta ‘transit aliran ringan’ ( LRT), Kota Samarahan mega patut disambung enggau Mengeri Kuching.
Tambah mega, Kota Samarahan enggau Mengeri Kuching bela ngembuan penyampau mensia tu lebih mayuh ba sekeda endur lalu ngembuan dagang ke bekaul.
“Nya alai nama kebuah ba pengerami makai lemai ngintu taun kedua MPKS kena 11 November tu tadi, MPKS mantaika langgur penemu LRT perintah ngambika diperati baru lalu nyema ulih anang betangguh enti bisi agih belanja.
“Ungkup sementara diatu, lampu trafik dipasang ba jalai beputar besai ba Kota Samarahan, ngujungka trafik lubah sereta sekut maya jam orang mayuh pansut.
“Kepala Menteri udah besemaya deka mantu ba pekara lampu trafik lalu berati baru langgur penemu LRT lalu nya chukup meri pengaga ngagai kami,” ku iya madah nengah Whatsapp kemari.
Tandu Peter, penanggul trafik sekut ke ditapi penguna ba Kota Samarahan nyadi isu besai jam ke diatu.
Nyema penanggul tu enda diputar, lama laun penanggul tu deka ngeruga pemansang, puku enggau dagang ba Kota Samarahan.
Mensia mayuh tentu enggau diau tauka bejalaika pengawa dagang ba palan ke udu trafik sekut lalu nadai ulih jaga.
“Laban nyadi piak bekuasa kandang menua, MPKS irauka penanggul trafik ke ditapi peranak ba Kota Samarahan lalu ngiga jalai pemadu manah dikena mutar penanggul tu.
“Enda patut MPKS enda irau tauka pejam mata pasal penanggul tu lalu MPKS meseti bejalaika tanggungpengawa begulai enggau ejensi perintah ke bukai,” ku iya.
Nengah mayuh pemansang dipelaba angkat ba Samarahan, Peter nyemetak madah penanggul trafik meseti diputar lengkas.
Ku iya, endang manah agi nyema penanggul tu diputar sebedau iya nyadi raya agi dudi hari.