Pemanah pengawa Bustaman dalam TDM meruan dikenang
KUCHING: Panglima Briged Ketiga Infantri, Brigedier Jeneral Mohd Bustaman Mat Zin pinchin rasmi berengkah kemari pengudah gawa pengelama 40 taun nyadi Soldadu Darat Diraja Malaysia (TDM).
Pengerami baris nyerah nerima pangku pengawa Panglima Briged Ketiga Infantri Malaysia ba Padang Kawad Kem Semenggo 11 RAMD nya dikemataka Panglima Satu Divisyen Mejar Jeneral Datuk Toh Choon Siang.
Bustaman mangku pengawa nyadi Panglima Tiga Briged kenyau 30 Mei 2016 lalu diatu pengawa nya dipangku Leftenan Kolonel Salmi Istikh Ahmad nyadi Pemangku Panglima Tiga Briged ti ke-35.
Penuduk Panglima Tiga Briged nya ila deka dipangku Kolonel Mohd Isa Jaafar diatu agi kemisi ba menua luar.
Pengawa baris berengkah enggau adat Nyerah Nerima Pangku Pengawa Panglima Briged Ketiga Infantri Malaysia ti ngemataka Bustaman nyerahka pangku pengawa ngagai Panglima Tiga Briged Salmi.
Pengawa nya ditangkan enggau atur nyain Dokumen Nyerah Nerima Pangku Pengawa enggau Tongkat Kuasa Panglima Tiga Briged dikemataka Toh.
Pengawa Baris Nyerah Nerima Pangku Pengawa Panglima Tiga Briged mungkur 24 pemesai enggau 297 kaban lain-lain pangkat betuaika Sapit Komander Rejimen 511 AW Leftenan Kolonel Fua’at Mohd Yatim.
Toh ba jaku iya nesau raban Tiga Briged neruska tanggungpengawa dikena nentuka penyulut briged nya ditu.
“Pengawa ketuai ke udah dileka tu patut ditampung dalam ngetanka pengelikun bumi kenyalang tu.
“Timpuh 40 taun tu endang lama lalu pengawa ke udah digaga panglima enda ulih dibalas enggau wang ringgit, nya alai aku nesau semua staf Tiga Briged malas pemanah pengawa tu enggau chara neruska pengeransing gawav dikena nyaga pemanah nama enggau penyulut Tiga Briged tu,” ku iya.
Dulu ari nya, Bustaman meri terima kasih ngagai semua staf Tiga Briged ke udah meri kerejasama sereta sukung sekumbang iya mangku pengawa nyadi Panglima Tiga Briged ke-34 pengelama dua taun enam bulan.
Iya ngarap semua renggat pemesai enggau kaban terus angkun sereta ransing ngereja pengawa meri sukung ngagai Pemangku Panglima Tiga Briged ke baru dikena nentuka penyulut organisasyen tu.
Sama bisi datai Ketuai Staf Markas 3 Briged Lt Kol Ilyas Hanafi, bala pemesai kanan, Kaban BAKAT dipegai Briged Ketiga Infantri Malaysia enggau bala Pinchin Soldadu.