Penemu nya enda engkeman lalu patut diubah laban perintah sigi enda belembut ba pekara pengelantang anak mit
KUALA LUMPUR: Dewan Rakyat kemari diterang kebuah nikah umur kelalu biak nyadi chara mutar penanggul rama enggau penyeranta kebendar enda engkeman lalu penemu nya patut diubah.
Sapit Menteri Besai Datuk Seri Dr Wan Azizah Wan Ismail madah perintah sigi enda belembut ba pekara anak mit lalu hak raban nya meruan dijaga sereta dikemerat.
“Kelimpah ngubah undang-undang ke benung digaga, perintah mega bejalaika program munaska penyeranta, nambahka penyedar bala apai indai enggau pengibun dikena nentuka anak mit enda tinggal sekula nyentuk sida manggai umur 17 taun.
“Opis Menteri nyemetak madah anak mit patut diberi awak ngerembaika penau diri ba bidang pelajar. Nya alai, opis menteri deka nampung kerejasama enggau semua piak bekaul nyapai juluk ngintu pengelantang anak mit,” ku iya.
Iya nyaut tanya Khairy Jamaluddin (BN-Rembau) ti deka nemu pengawa baru dikena ngemanah enggau neritka atur pasal pemendar nikah biak umur enggau timbal ari perintah bekaul ubah ba akta ke bisi diatu dikena nagang pengawa nikah ba umur kelalu biak dudi hari maya baum ditu kemari.
Dr Wan Azizah ke mega Menteri Pemansang Orang Indu, Ruang Bilik enggau Raban Bansa madah perintah ngelanggur Rang Undang-Undang ungkup Akta Undang-Undang Keluarga Islam ( Wilayah- Wilayah Persekutuan) 1984 (Akta 303) enggau Akta 164 abis laun ba penggal kedua aum Dewan Rakyat taun baru.
“Ungkup nikah biak umur ba orang ukai Islam, memo- randum Kaunsil Menteri pasal langgur ubah Akta Membaharui Undang-Undang (Perkahwinan dan Perceraian) 1976 (Akta 164) deka dibantai ba Aum Kaunsil Menteri ba taun 2019.
“Ubah tu iya nya ngundan pekara bekaul ripot rama, ripot pengerai enggau ripot ari Polis Diraja Malaysia ungkup peminta nikah umur kelalu biak nengah Akta 164 ti dikuasa Opis Menteri Dalam Menua,” ku iya.
Dr Wan Azizah madah bisi sekeda nengeri udah ngambi atur proaktif enggau kreatif dalam bejalaika Prosedur Operasyen Standard (SOP) bekaul enggau isu tu.
“Ambika banding ba nengeri Kedah, kelimpah patut mantaika ripot rama ungkup sepasang orang ti deka nikah ba umur kelau biak sida mega patut ngenataika diri ba Opis Pengintu Pengelantang Pendiau ( JKM) pengudah nikah awakka diberi penemu sereta dikemata nyentuk sida manggai umur 18 taun.
“Selangor mega udah lama sepenemu enggau JKM nengeri, nentuka Ripot Rama ti dibantai ungkup minta nikah umur kelalu biak ngerunding sekeda pekara baka penatai asal, pelajar, pendiau pengidup enggau palan endur anak mit nya diau,” ku iya.— Bernama