UNTAN nyulut ngalahka 12 tim ti nyereta Festival Tanda Borneo Ke-7
BINTULU: Festival Tanda Borneo Edisyen Ke-7 2018 ke diatur lima hari berengkah 30 Oktober nyentuk 3 November chukup richah nengah tanda dipandangka 13 tim penari ari universitiuniversiti sereta kolej ba Pulau Borneo dipenyadi ba Dewan Sri Kenyalang Universiti Putra Malaysia Kampus Bintulu (UPMKB).
Pengerami nya ngemataka raban tim betanda ari Universitas Tanjung Pura (UNTAN) ari Kalimantan Indonesia mujur nyadi champion penuh lalu mai pulai perais RM5,000, trofi pekit, trofi menang sereta setipikit disuaka Ketuai Pemesai Eksekutif Kaunsil Seni Sarawak Sharkawi Amit ngarika Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah.
Udah nya, lumur dua dipenggi Universitas Lambung Mangkurat (UNLAM) ke nerima perais RM3,000, trofi menang enggau setipikit. Ditangkan Kolej Sabah International Dynamic Management (SIDMA) ke bulih lumur tiga lalu nerima perais RM1,000, trofi enggau setipikit.
Pengerami tu mega ngemataka UNTAN mujur nyadi champion Anugerah Pekayan lalu Universitas Palangkarya ( UPR) enggau Universiti Teknologi Mara( UiTM) Sarawak bela bulih lumur dua enggau ketiga.
Anugerah Koreografer mega dipenggi UNTAN lalu lumur dua enggau lumur tiga bela dipenggi Universitas Lambung Mangkurat (UNLAM) enggau Kolej SIDMA Sabah. Tu ngemataka penyulut UNTAN dalam pengerami betanda dua taun sekali entara universiti-universiti di Pulau Borneo tu.
Pengerami betanda tu diatur UPMKB begulai enggau Opis Menteri Dagang Temuai, Seni, Main Asal, Nembiak enggau Lumba Sarawak sereta Opis Residen Bagi Menua Bintulu nya dipasuk delegasi tiga buah menua nyengkuam 13 universiti enggau palan pelajar tinggi ba Pulau Borneo iya nya Indonesia, Malaysia ( Sarawak Sabah) enggau Brunei Darussalam.
Tim betanda nya tu iya nya UPMKB (tuai rumah), UiTM Kota Samarahan Sarawak, UiTM Kota Kinabalu Sabah, Universiti Malaysia Sarawak (UNIMAS), Universiti Malaysia Sabah (UMS Kampus Entarabansa Labuan), Kolej SIDMA Sarawak, Kolej SIDMA Sabah enggau Universiti Brunei Darussalam (UBD).
Universiti- universiti ari Kalimantan Indonesia nyengkaum UNTAN, UNLAM, UPR, Universitas Mulawarman enggau Universitas Borneo Tarakan (UBT).
Berebak enggau nya, tuai rumah ungkup Festival Tanda Borneo ba taun 2020 iya nya lah UBT di Kalimantan Indonesia.
Festival tanda ke diatur enggau chukup richah nya bela dikemataka Mandal Chanselor UPM Profesor Datin Paduka Dato’ Dr Aini Ideris, Sapit Mandal Chanselor ( Pekara Pelajar enggau Alumni) UPM Profesor Dr Mohd Roslan Sulaiman, Dirketor Kampus UPMKB Profesor Dr Bujang Kim Huat, Sapit Residen Bagi Menua Hussaini Hakim sereta Rektor- Rektor universiti enggau kolej, bala pengari universiti, universitas enggau kolej sereta raban pengereja pengawa ari UPMKB.
Pengawa nutup pengerami tu dipandangka pengawa merindang ari raban Kelab Betanda Adi Mastuli UPM Serdang, Kelab Tandak Remang Tatau Bintulu dan Mukun Cilik Cabik Geronong Miri.