Tu nerima sambut ti positif laban ulih ngelempungka tating belanja nembiak nya jemah ila kelebih agi sentang pekara pelajar
PANTU: Atur perintah nengeri meri RM1,000 ngagai tetiap anak mit peranak Sarawak ke ada berengkah taun 2019 siti atur ke ngena.
Menteri Muda Nembiak enggau Lumba Datuk Snowdan Lawan madah pemeri nya tau dikena melanja pengawa besekula sida jemah.
Ku iya, duit RM1,000 nya deka disimpan, diperanak ba akaun anak mit nya lalu semina tau diambi pengudah umur manggai 18 taun.
“Asal ada berengkah 2019 lalu anak mit nya peranak Sarawak, iya deka diberi RM1,000. Enti ukai peranak Sarawak, enda deka diberi.
“Tang duit tu enda tau diambi, semina disimpan dalam akaun anak mit nyentuk ngagai umur manggai 18 taun,” ku iya.
Snowdan mansutka jaku nya rambau bejadi Sukan Tahunan Gerempung Apai Indai enggau Pengajar (PIBG) Sekula Primari (SK) Tuba 2018, Pantu kemari.
Iya ke mega Kaban Kunsil Nengeri (ADUN) Balai Ringin nambah, pengudah umur manggai 18 taun duit ke diperanak nya deka nambah.
“Duit nya tau dikena melanja pengawa sida ti nampung pelajar ngagai universiti, kolej tauka palan pematih ke bukai,” ku Snowdan.
Atur meri RM1,000 nya dibantai Kepala Menteri Datuk Patinggi Abang Johari Tun Openg rambau nyimpul jurai Aum Dewan Undangan Nengeri (DUN) kena Hari Tiga tu tadi.
Ngenang sentang kaul bukai, Snowdan madah deka nyendia agih belanja nengah Program Ubah Menua Pesisir (RTP) dikena ngaga dewan ungkup SK Tuba.
Pengawa nya ku iya deka berengkah dalam awak ke semak alai dewan Sk Nyelita, Sk Gawang enggau SK Sg Pinang udah tembu digaga.
Ba pengerami nya Snowdan bisi ngagihka RM10,OOO ngagai SK Tuba.
SK Tuba bisi 68 iku nembiak nyengkaum nembiak pra- sekula enggau 14 iku pengajar sereta 8 staf.
Bela datai YDP PIBG SK Tuba Tangga anak Ngumbang, Kepala Pengajar Payakon Golong enggau raban tuai rumah ari rumah panjai besemak.
Tang duit tu enda tau diambi, semina disimpan dalam akaun anak mit nyentuk ngagai umur manggai 18 taun. Datuk Snowdan Lawan Menteri Muda Nembiak enggau Lumba