Ibraco Bhd enggau Hope Place Kuching udah meri bantu ngagai Missi
KUCHING: Siku indai tuai meri tabi puji ngagai Tuhan pengudah nerima bantu ari sebuah kompeni ngemansangka reta tanah, Ibraco Berhad, nengah bantu ari Hope Place Kuching enggau Sepital Sentosa.
Missi Bi, 72, madahka diri tekenyit amat lebuh iya nerima penatai raban ari Ibraco Berhad enggau NGO Hope Place Kuching.
Missi diau enggau anak lelaki iya ba Stutong Baru. Rumah iya dientak ba tanah paya lalu tebal agi rumah besemak digaga ari kayu enggau begantung.
Rumah Missi bisi baruh mimit lalu patut amat diseruri. Sekeda geladak rumah udah bumbus/merekah lalu rumah kayu begantung majak repok. Tu tau amat ngeruga pengelikun, deka rubuh dudi hari.
“Andau kayu mit pen udah runtuh. Tang tabi puji amat ngagai Ibraco ti udah ngemanahka andau kayu ti ngelawa rumah nya,” ku Pemungkal Hope Place Kuching, Kelvin Wan.
“Asai ati kesal bebali nyadi lantang pengudah Ibraco Berhad madah deka ngemanahka jematan kayu nya,” ku iya.
“Hope Place deka meri tabi puji enggau terima kasih ngagai Ibraco Berhad ti udah gerah jari nyeleti rumah iya enggau nadai bebayar. Pengawa raban Ibraco nyadika teladan ngagai semua ti deka ngaul diri chakah ba pen- gawa pengasih menua tu,” ku Wan.
Missi iya nya siku ari penerima rejista NGO ari bantu pengelantang lebih ari dua taun ke udah.
Hope Placse Kuching bejalaika pengawa nganjung bantu tiga bulan sekali laban mayuh ruang bilik ba lis penerima bantu sida.
Raban sida meri susu tepung, lampin, enggau pemakai ngagai raban begunaka bantu enggau raban seranta baka indai tunggal ti mayuh anak besekula, orang tuai diau kediri enggau sida ti bepenatai pemisi baruh RM500 sebulan.
Diatu raban NGO nya mantu lebih ari 180 ruang bilik.
Berindik ari sida begunaka saup ari mensia mayuh, Hope Place Kuching tau ditelefon nengah lumur 013-5672775 tauka 082-505987.
Bantu mata duit tau dipasuk atas nama Persatuan Kebajikan Harapan Kuching ke dalam akuan Maybank 5112 8900 1160.