250 iku nembiak di Niah, Suai deka nyereta ‘Klinik Main Bol Begulai Enggau Jalil Ramli’

MIRI: Kunsil Kepala Pengajar Pelilih Subis enggau Serakup Main Bol Bagi Menua Miri deka ngatur ‘ Klinik Main Bol Begulai Enggau Jalil Ramli’ ba Padang Sekula Primari (SK) Kita Niah.

Sekretari Serakup Main Bol Bagi Menua Miri, Mohd Azra madah sepenyampau 250 iku nembiak sekula primari Zon Niah enggau Suai deka nyereta klinik nya.

“Ba renggat keterubah suba, iya udah digulu urung 160 iku penyereta seraya renggat kedua (Hari Enam) tu dipelaba deka disereta 250 iku nembiak,” ku iya madah ngagai Utusan Borneo.

Nitih ku iya, klinik renggat keterubah suba diatur lanchar lalu bala nembiak gagit amat ngiri penemu begulai enggau pematih lagenda Sarawak Jalil Ramli.

Diatur ba padang bol SK Selanyau, kesemua nembiak gagit amat nitihka latih ari iring Jalil Ramli.

“Bala nembiak diberi latih pemun main bol sereta chara main ti betul enggau klinik bela diiring bala pemain Palan Pemansang (PP) Kunsil Lumba Nengeri (MSN) Miri,” ku iya.

Klinik ti fokus ngagai nembiak sekula primari diperati nyadi pengawa pemun ngemansangka main bol ungkup timpuh panjai.

Bala penyereta biak ku iya ti ulih nerima ajar enggau ngiri peneleba begulai enggau pematih profesional ulih nyingkang jauh ba main bol.

“Pengudah sida bisi penemu pemun main bol ba umur biak, peluang sida nyadi pemain nembiak profesional besai amat,” ku iya.

Kaban Parlimen ( MP) Sibuti, Lukanisman Awang Sauni sereta Presiden Serakup Main Bol Sarawak Posa Majais dipelaba datai maya pengawa nutup program.

Sebarang penerang silik tau telefon nuju Tila Chakuk ba lumur 019-8883772 tauka Rohaidee Samsu (0168851021).