Pelajar ti manah puku ti nemban nempa penyulut rebak baru
SRI AMAN: Nyediaka peluang pelajar ti manah ngagai bala anak kemaya hari tu endang puku ti pemadu manah ungkup penyulut sida jemah ila, pia ku Pemesai Opis Pemansang Komuniti (KEMAS) Bagi Menua Sri Aman Josipah Sabas.
Nya alai pemujur bala anak jemah ila bepanggai ba bakani chuan runding sereta pelajar ti diterima sida diatu ke alai apai indai orang ti pemadu beguna lebuh ti ngatur jalai pengidup anak sida.
Iya madah munyi nya lebuh ti bejaku maya bejadi Majlis Anugerah Kecemerlangan Kanak- kanak Tabika dan Taska KEMAS’ Bagi Menua Sri Aman ti bepalan di Dewan Suarah , Sri Aman ditu pagi kemari.
Ku iya, meri pelajar ti menyana ngagai bala anak diatu endang nyadi puku ti pemadu engkeman ungkup pengidup jemah ila.
Beserimbai enggau nya, endang enda ngerugika kitai ti nyadi apai indai ti patut terus nanam puku ngambika pengidup bala anak jemah ila lalu kitai ti nyadi apai indai tentu nya deka andal ngulihka asil ari puku nya jemah ila.
Ku iya nambah, apai indai enda patut nyerahka tanggungpengawa nyeridi anak sida ngagai pengajar aja, tang tanggungpengawa nya patut sama begulai mutarka pekara nya.
Berindik ari nya, Josipah mega udah mantaika pengaga ati enggau meri terima kasih ngagai semua pengajar KEMAS di bagi menua nya laban udah bebendar gawa enggau ransing ti enda ngetu bejalaika tanggungpengawa ngemansangka pemanah runding komuniti.
Ku iya nambah, diatu KEMAS dipadahka chakah ngatur pengawa sida ti nyadi sebuah ejensi perintah ke bebendar deka nempa modal mensia ti nyulut.
“Aku temegah ati sereta beterima kasih enggau komitmen nya lalu nama utai ti dipeda aku, pengajar kitai di KEMAS endang komited dalam nama pan program ti diatur sereta endang nerima sambut ti chukup manah,” ku iya.
Ku iya, ukai siti pekara ti mudah baka ti dirunding kitai deka meri pelajar ti manah sereta nyulut nya ukai semina ngiring sereta ngajar dalam semua aspek, tang nya mega begunaka tanggungpengawa ti likun enggau begunaka penyabar ti besai kelebih agi ti ditapi pengajar KEMAS.
“Sida tu sanggup ngajar nembiak mit ti beumur 4 nyentukka 6 taun dalam penyampau nembiak ke mayuh nyentukka sida ulih nguasa penemu macha, nulis enggau ngira,” ku iya.
Sama bisi datai ba pengerami nya Penyelia Pendidikan Awal Kanak-kanak di Opis KEMAS Bagi Menua Sri Aman Wan Habeeb Wan Mohamad sereta bala ke bukai.
Urung 250 iku nembiak mit Tabika enggau Taska KEMAS di Bagi Menua Sri Aman nerima setipikit enggau perais sida dalam pengerami nya pagi kemari.