Bonus ari perintah nengeri, ke pemadu manah kala diberi
KUCHING: Kongres Kesatuan Pekerja- Pekerja Dalam Perkhidmatan Awam (Cuepacs) Nengeri Sarawak (CNS) madahka bonus sebulan setengah batang gaji tauka minimum RM2,000 ungkup pengereja pengawa opis perintah Sarawak, bonus ti pemadu manah kala diberi perintah nengeri.
Chairman CNS, Ahmad Malie ngarika CNS beterima kasih ngagai perintah nengeri, ari baruh iring Kepala Menteri Datuk Patinggi Abang Johari Tun Openg, laban ti meri bonus nya ngagai pengereja pengawa opis perintah Sarawak dalam Bajet Negeri 2019.
“Ba CNS tu mih bonus ke pemadu manah ti kala diberi perintah Nengeri Sarawak dikena ngenang sereta meri terima kasih ngagai pengereja pengawa opis perintah nengeri ti seruran taluk enggau beintegriti tinggi mantu ngemansangka Sarawak.
“Nya alai CNS ngelalau pengereja pengawa opis perintah Sarawak ngambika ngembuan asai beterima kasih nerima bonus tu lalu ngena nya enggau chara ti manah agi ujung taun baka tu dikena meli barang sekula anak,” ku iya madah ngagai Utusan Borneo, kemari.
Ahmad ngarika CNS meri penemu nya, lebuh dipinta ngenang pasal bonus sebulan setengah batang gaji tauka minimum RM2,000 ungkup pengereja pengawa opis perintah Sarawak, ke dibantaika Abang Johari maya nyimpul jurai aum kunsil nengeri ke- 18, aum ke- 2 penggal ke-3 ensanus.
Bonus sebulan setengah batang gaji tauka minimum RM2,000 nya deka dibayar ujung bulan Disember taun tu.
Berebak enggau tu, CNS mega ngapil ngagai perintah nengeri kelebih agi ngagai Kepala Menteri ngambika ulih berunding ngagihka bonus ‘khas’ RM1,000 ngagai semua pengereja pengawa opis perintah besai ti meri servis di Sarawak.
Nyema perintah nengeri tu sedia berundingka apil agih bonus khas nya ku Ahmad, nya udah tentu berita manah sereta ngandalka ati ngagai pengereja pengawa opis perintah besai ti sama mai sereta ngemujurka pemansang ba Sarawak.
“Enti perintah nengeri sedia ngagihka bonus khas baka ke diapil CNS, tu mandangka Perintah Sarawak ari baruh iring YAB Datuk Patinggi Kepala Menteri kitai amat beratka sereta ibuhka pengelantang semua pengereja pengawa opis perintah ke gawa di nengeri tu enda ngira sekalika gawa ba opis perintah nengeri tauka besai.
“Nyema perintah nengeri deka berundingka apil CNS tu, reti nya Bajet Perintah Nengeri Sarawak 2019 iya nya bajet ke nyelai sereta besejarah dalam menua kitai, laban Sarawak dulu ari nengeri bukai ke sama andalka bantu pengereja pengawa opis perintah besai.
“CNS amat ngarapka perintah nengeri manah ati berundingka apil tu ngambika ulih nyadi nyata sebedau taun 2018 tu abis,” ku iya ti mega nyadi Presiden Gempung Gerempung Pengajar Bumiputera Sarawak.