Raban pekebun chabi diperansang betanam chara teknologi festigasyen
BINTULU: Sayur iklim jelan penyelap baka chabi ditanam ba kandang tanah tinggi, ke alai tebal agi sayur ba Malaysia agi ditanam ngena chara lama tauka konvensional ba tanah betaba.
Pengawa nanam chara konvensional tu bisi risiko tinggi laban seruran napi penanggul baka gaya hari enda manah, indu utai enggau penyakit.
Risiko tinggi agi ba sayur iklim baka tu ti ditanam ba tanah baruh laban gaya hari panas enggau ujan lebat tau ngasuh mayuh agi rusak.
Dikena mutarka penanggul tu, chara nanam ti diperambu di baruh struktur lindungan ujan bekenaka teknologi fertigasyen. Betanam chara fertigasyen berengkah dipejalai ba Malaysia dalam taun 1990 an ba kandang menua jelan penyelap ba Cameron Highlands Pahang lalu berengkah dikomersilka dalam taun 2001. Pengawa nanam ngena sistem fertigasyen dikerembai enggau dikemansangka Opis Betanam Betupi enggau Kaunsil Gerempung Orang Bumai. Diatu. nanam chara fertigasyen nyadi muntang agi, maju sereta dikerindu enggau pemisi penemu pasal sum, kereban, enggau strategi ngatur nutrien ti efektif.
Berindik ari nya, Taman Pertanian Universiti, Universiti Putra Malaysia (UPM) Kampus Bintulu udah ngatur Kus Nanam Chabi Ngena Sistem Fertigasyen ba kampus universiti nya enggau ngemeratka latih teori enggau amali, ti nerima timbal manah ari bala komuniti ba Bagi Menua Bintulu, nyengkaum bagi menua bukai baka Kuching, Sri Aman, Sibu engga Miri.
Kus udah diatur kena 10 November 2018 berengkah ari pukul 8 pagi nyentuk pukul 5 lemai dikena meransang pengawa meri penemu betanam ngagai komuniti menua pesisir seriris enggau Juluk UPM, gawaka pengawa ti ngemai reti penyenang enggau pemansang menua sereta ngemansangka mensia nengah pengawa nyerungkai enggau ngerembaika penemu.
Kus teori ungkup 80 penyereta muakka pagi diatur ba Dewan Taklimat Bangunan Pentadbiran UPMKB lalu muakka lemai kus ba Rumah Pemprosesan Tanaman Ladang Kongsi 2 UPMKB.
Pengelicha kus Pemesai Betanam Betupi UPMKB Sylvester Igak Kana enggau Pengelicha Kanan Jabatan Sains Tanaman Fakulti Sains Pertanian dan Makanan UPMKB Dr Franklin Ragai Kundat. Kus udah digulu bala penyereta datai ari selampur nengeri ti datai ari pupu bansa.
Siku ari penyereta meri timbal manah pasal kus nya, Peter Goh penatai asal ari Kuching madahka tu kus keterubah ngaul Pengawa Nanam Chabi Chara Sistem Fertigasyen ti kala digulu iya.
Iya madahka diri bisi ati belajarka chara nanam ngena sistem fertigasyen betanamka sayur lalu pengudah ngulu kus tu, ngasuh iya meretika agi pasal sistem nya.
Kelimpah ari nya ku iya, chara ngenataika kus ti meruan lalu mayuh tanya saut antara penyereta enggau bala pengelicha ti meri penemu manah enggau atur pejalai pengawa ba Ladang Kongsi 2 UPMKB chukup manah sereta meri peneleba ti beguna amat.
Berebak enggau nya, pengawa nyuaka setipikit ngagai bala penyereta kus udah dipenyadika Dr Franklin Ragai Kundat enggau Pemesai Betanam Betupi Kanan Satu Maling enggau Sylvester.
Kus mujur diatur seriris enggau juluk ketiga UPM ngangkatka rentayan servis industri enggau komuniti sereta juluk keempat, ngenegapka UPM nyadi palan penyulut betanam betupi.