Sarawak nengeri ke pemadu komited mutarka penanggul dunya angat nengah bemacham pengawa ti dipejalaika
KUCHING: Sapit Kepala Menteri, Datuk Amar Awang Tengah Ali Hasan nyangkal tuduh Gerempung Ukai Dikuasa Perintah ( NGO) enggau komuniti antarabansa pasal pengawa perintah Sarawak ti nyaga enggau ngintu rampa menua.
Nitih ku Awang Tengah, Sarawak nengeri ke pemadu komited di Malaysia ba komitmen mutarka pengangat dunya, nengah pengawa ngurang ngelepaska gis rumah gadung.
Naka ke diatu, 74 peratus tauka 3,452 megawatt (MW) pemansut kuasa ba Sarawak datai ari kuasa ke tau dikena baru ti diambi ari tiga projek tekat hidro iya nya Batang Ai, Bakun enggau Murum.
Tu ku iya ngelui ari tagit Malaysia ke deka nyapai 2,080 MW kuasa tau dikena baru lebuh manggai ba taun 2020 seraya nyeliah 7.0 juta tan karbon dioksida ninting taun.
Dikena nambah nya ku iya, Sarawak ngembuan juluk ngemodenka perengka pengangkut mensia mayuh nengah chara ngena hidrogen ungkup bas.
“Taja pia, NGO enggau komuniti antarabansa enggau nadai penyinu nuduh Perintah Sarawak munuh jelu siga, ngemunaska biodiversiti kampung enggau tanah kerapa, enda bebasa sereta enda ngaku hak komuniti asal enggau mayuh agi tuduh ke bukai.
“Tuduh nya bula lalu aku rindu deka mantaika sebagi ari pengeran Sarawak ba pengawa ngintu biodiversiti,” ku iya dalam teks jaku iya nyerumba ‘Jamuan Malam Gala Persidangan Kualiti Udara Lebih Baik (BAQ)’ Ke-10 ke diatur ba Palan Konvensyen Borneo Kuching (BCCK) ditu, ensanus.
Teks jaku iya dibacha pengari iya, Menteri Muda Pemansang Dagang Mit enggau Jelan Pemesai sereta Orang Dagang, Datuk Mohd Naroden Majais ti mega Menteri Muda E-Dagang.
Entara pengawa ke dipejalaika Sarawak ba pengawa ngintu biodiversiti iya nya, ngazet urung 1 juta hektar kandang titik angat biodiversiti Dalam Kandang ke Dijaga Penuh (TPA) lebuh manggai taun 2020.
Naka ke diatu ku Awang Tengah ti mega Menteri Pemansang Mengeri enggau Pengeraja Asal Kedua, lebih ari 792,510 hektar udah digazet enda nyengkaum ekosistem tasik enggau darat ti mungkur urung 1.243 hektar.
Perintah Sarawak mega komited deka nanam 1 juta hektar pun kayu industri ngena spesis ke jampat tumbuh baka akasia, ke alai diatu lebih ari 400,000 hektar udah ditanam.
Pengawa bukai ke tu tuju nya nyengkaum ngazet 29 kandang endur nimbun ai ujan ti mungkur urung 4.08 juta hektar enggau 58 agi kandang endur nimbun ai tauka 4.1 juta hektar udah dikelala digazet jemah ila.
Perintah Sarawak ku Awang Tengah, mega deka bebendar neritka atur sereta nagang pengawa nunu chara tebuka biomas pengudah taun 2020, kelimpah ari tuju jalai pengarap enggau betanam betupi ulih raban bansa menua pesisir.
Dikena nagang tanah kera- pa ari penusah angus, Kaunsil Pengeraja Asal enggau Rampa Menua (NREB) udah numbuhka Prosedur Operasyen Standar (SOP) dikena nagang tauka nyeliahka tanah kerapa angus di Miri.
SOP diatu ku iya, udah nyata ngasi ulih ngurangka penusah angus ba tanah kerapa lalu SOP tu ulih dikena ba endur bukai.
Ngenang pasal aum besai nya, Awang Tengah madahka nya setipak amat sereta chara ti beguna dikena mansang ke mua lalu nyapai juluk timpuh panjai kitai Asia ti deka ke nadai angin ti kamah.
Ngena rambai jaku “Regional Action, Global Impact”, Awang Tengah ngarapka aum besai nya deka nyendia pelasar ke beguna dikena belajar, bekunsi penemu sereta ngenegapka agi kerejasama nempa rantau tu nyadi kandang ti nadai angin ke kamah.
Sama bisi datai, Sapit Menteri ba Opis Menteri Besai (Pekara Islam), Fuziah Salleh, Presiden Gempung Gerempung Forum Angin Beresi Malaysia (myCAS), Dr. Noor Zaitun Yahya enggau ke bukai.
Taja pia, NGO enggau komuniti antarabansa enggau nadai penyinu nuduh Perintah Sarawak munuh jelu siga, ngemunaska biodiversiti kampung enggau tanah kerapa, enda bebasa sereta enda ngaku hak komuniti asal enggau mayuh agi tuduh ke bukai. Datuk Amar Awang Tengah Ali Hasan Sapit Kepala Menteri Sarawak