SMK Sri Aman, Chapel St Peter mujur dikemanah ngena ungkup belanja RTP
SRI AMAN: Raban sekula SMK Sri Aman berasai lantang ati sereta meri terima kasih laban projek melakin baru laman sekula, palan ngengkah kerita enggau jalai alun tama ke sekula nya udah tembu sereta nyadi nyata.
Pemujur nya asil ari pengeran Yang DiPertua ( YDP) SMK Sri Aman, Jilin Itar ti berundingka pekara nya enggau pengari rayat, ngambika juluk ati raban sekula nya nyadi nyata.
Projek nya udah tembu dipejalaika nengah ungkup belanja Program Transformasyen Menua Pesisir ( RTP) ari Menteri Muda Pengelantang Pendiau Raban Bansa ti mega nyadi Kaban Kunsil Nengeri ( ADUN) Simanggang, Datuk Francis Harden Hollis, ti beungkus RM250,000.
Projek nya dipejalaika ari baruh kemata Opis Kereja Raya ( JKR) Bagi Menua Sri Aman, ke nyadi siti ari mayuh bengkah projek ti udah dipejalaika dalam sitak Kunsil Nengeri (DUN) Simanggang.
Dulu ari nya, Harden bisi nemuai seraya ngabas projek ngemanahka Chapel St Peter, Batu Lintang ti dipejalaika nengah projek RTP 2017 baka nyilih atap enggau melakin sereta ngemesaika laman chapel nya, ngambika meri pengelantang ngagai raban Kristian ke besembiang dia.
Projek nya udah tembu lalu ungkus belanja dikena ngemujurka projek nya RM200,000.
Pengeran Harden deka ngenukuka pemansang dalam sitak ke diarika iya nerima puji enggau terima kasih ari peranak ba kandang menua nya ti deka ke pemansang.
Pekara ti dipekuhka iya ti ngarika perintah, iya nya deka nentuka rayat ulih ngasaika perengkaguna mensia mayuh awakka ulih bejalaika aktiviti ekonomi seraya ngangkatka tikas pengidup raban bansa di menua pesisir.