Bisi 12 pesereta deka bepekit ngerebut gela Bintang Kecil RTM 2018
KUCHING: Sepenyampau 12 iku nembiak mit ari serata Malaysia deka bepekit belagu ngerebut gela champion ba Bintang Kecil RTM 2018 taun tu.
Ari Sarawak iya nya Nor Mohamed Muzaid (Ejoy), 11, Puteri Nurnasuha Yahya (Putri), semilan enggau Syayid Afi Jamin (Afi), 11; ari Sabah iya nya Dayang Irsyadhania Iraril (Dhania), 10, Daryl Damian, 10 enggau Misnalia Muhinin (Dolly), 11.
Siku pesereta tetiap nengeri ari Perlis Nur Safiya Ardina Shamsul Azrin (Dina), 11, ari Kuala Lumpur El Farabi Faeez Muhammad Faeez (El), 10, Negeri Sembilan Adriana Qaseh Dania Asdahrizam ( Qaseh), 11, ari Melaka, Fatin Nur Amalia Budiman Jawari (Alia), 11, ari Pahang Nasrul Ikhwan Saidi (Nasrul), 11, enggau ari Terengganu Putera An-Nasa’ei Ubaidah Sahar Sa’di (Putera), 11, pia ku Penulung Kanan Direktor Besai Seksyen RTM, Tabad Sakai.
“Pesereta final deka belagu ba dua konsert ba Auditorium P.Ramlee RTM kena 17 enggau 24 November, lalu renggat final deka diatur kena 1 Disember ba Stadium Tertutup.
“Ba konsert keterubah, tiga iku pemekit deka ditingkil lalu tiga iku agi ba konsert kedua. Semina deka bisi enam iku pemekit aja ba renggat final,” ku iya madah ba aum pengarang berita ba RTM apin lama udah.
Champion deka pulai mai RM10,000 seraya lumur dua enggau lumur tiga nerima RM7,000 enggau RM5,000. Tiga perais pemenang sagu ati deka pulai mai RM4,000 siku. Sida enam iku tu mega deka nerima trofi enggau setipikit. Pia mega perais tambah RM1,000 enggau trofi sereta setipikit ungkup Pemerindang Pemadu Manah.
Ku iya, sida ti ditingkil maya konsert keterubah deka pulai mai pulai RM2,000 siku lalu RM3,000 siku ba konsert kedua, ditambah trofi enggau setipikit.
Renggat final deka dipenyadika Kepala Menteri Datuk Patinggi Abang Johari Tun Openg enggau bini iya Datin Patinggi Dato Juma’ani Tun Tuanku Bujang.
Pekit tu diatur Radio Televisyen Malaysia (RTM) lalu semua konsert enggau renggat final deka ditaburka terus.
Berebak enggau nya, Penulung Direktor TV RTM Emma Kartika Zaini madahka bala peninga radio tau mendingka konsert ba SARAWAKfm enggau ‘online’ nengah sarawakfm.rtm. gov.my.
“NASIONALfm deka mantaika terus renggat final ungkup bala peninga ba Malaysia Barat enggau Sabah,” ku iya.