MPKS dipinta lengkas nyendia palan bedaja nitihka semaya
KOTA SAMARAHAN: Raban pedaja ba tisi Jalai Besai Samarahan-Jematan Batang Samarahan minta Kaunsil Mengeri Kota Samarahan (MPKS) ngelengkaska pengawa ngaga palan bedaja ba sitak nya.
Gerah nya dibantaika pedaja bekau penerang dipansutka Chairman MPKS Dato Peter Minos bekaul tagang bejalaika sebarang aktiviti bejual nyengkaum bedaja enda dikemendarka ba sepanjai Jalai Besai Kuching-Samarahan bepun 1 Januari taun baru.
Kenu ku siku orang bedaja ditu, Yazid Yusop, 33, nyema pedaja enda dikemendar bejual ba tisi jalai besai, nya deka ngeruga penatai pemisi sida.
“Dini agi kami deka bejual enti ditu (tisi Jalai Besai Samarahan-Jambatan Batang Samarahan) enda tau endur bejual.
“Tu aja penatai pemisi kami lalu enti enda nejual naka dikena kami ngiga duit dikena beridup,” ku iya maya dirandau ba palan dagang iya ke digaa ba tisi Jalai Besai Samarahan-Jambatan Batang Samarahan ditu kemari.
Berindik ari nya, Yazid ngansak MPKS enggau perintah nengeri ngelengkaska pengawa ngaga palan bedaja ba sitak tu baka ke udah disemaya.
“Nyema sida ( MPKS) deka neritka tagang tu, sedia lengkas palan alai kami bedagang ba endur ke engkeman ditu (Jalai
Samarahan-Jambatan Samarahan),” ku iya ti udah ngereja pengawa dagang nya kenyau 10 taun ke udah.
Sebedau tu, Yazid enggau sekeda pedaja bukai ke bedagang ba tisi jalai besai nya bejalaika pengawa dagang ba palan dagang dipenggi MPKS ba Pengkalan Feri Muara Tuang.
Bekau ari servis perengka pengangkut sungai ke udah diketu laban Jematan Batang Samarahan udah tembu nyadi penyampau temuai ke datai majak mimit lalu ngeruga penatai pemisi pedaja ba endur nya.
Nya alai, pedagang ba sitak nya ngaga pemutus mindah bedaja ba endur bukai iya nya ba tisi Jalai Besai Samarahan-Jambatan Batang Samarahan.
Kelimpah pedaja ba Pengkalan Feri Muara Tuang, bela kena keruga penanggul ke sebaka iya nya pedaja ba Kampung Melayu.
Kenu ku Siti Sara Sahari, 31, ke sebedau tu bedagang ba siti langkau ba Kampung Melayu, iya nyau mindah ngagai tisi Jalai Besai Samarahan-Jambatan Batang Samarahan laban jalai nya seruran ditapatka mensia mayuh.
“Enti kami enda dikemendar bedagang ditu agi dini kami deka ngiga jereki,” ku iya seraya madah kena Hari Empat ti tadi sida bisi dilawa staf MPKS deka ngambi nama genap pedaja ba sitak nya awakka disediaka palan bedagang ke baru enda jauh ari Jematan Batang Samarahan.
Nya alai, iya ngarap perambu gaga palan dagang baru nya ulih digaga lengkas sebedau taun baru laban kami nangi enda uklih bedagang ba sitak nya pengudah jaku tagang nya diterit.