Kepala Menteri patut ngatur randau enggau Komiti SPRM, AG nyiri CelO
KUCHING: Kepala Menteri Datuk Patinggi Abang Johari Tun Openg dipinta ngatur randau enggau Komiti Nagang Makai Suap Malaysia (SPRM) sereta Opis Luyar Menua (AG) ungkup nyiri siku Pemesai Integriti Profesional (CeIO) dalam mayuh bengkah opis enggau ejensi dalam perintah Sarawak.
Langgur penemu nya dipansutka Kaban Kunsil Nengeri (ADUN) Batu Lintang See Chee How tu madah, tu seraris enggau juluk Kepala menteri ti deka ngangkatka ulah integriti, akauntabiliti, pengelurus enggau atur pengawa ti manah.
“Pengawa baka nya patut dikelalu sereta diterima manah genap iku rayat Sarawak, tang kuing tuju ulah enggau ubah
institusi mesti ditetapka enggau betul,” ku iya nengah sebengkah penerang media ditu nimbal Kepala Menteri ba jaku ti dipansut maya nutup jurai Aum Kunsil Nengeri ( DUN) kena Hari Tiga tu tadi.
Ba jaku penutup iya, Kepala Menteri madah iya deka mai bala pengari ari AG enggau SPRM ngulu aum kaunsil tender nengeri.
Kenu ku See ke mega Mandal Chairman Parti Keadilan Rakyat ( PKR) Sarawak, penemu Kepala Menteri ti deka mai dua opis pematau ke besai reti baka tu dikena nerenak tusun pengawa perintah nengeri endang patut dikelalu.
“Tang penyampau pemesai ari Opis AG enggau SPRM enda patut ditatak semina ngulu aum kaunsil tender aja. Penatai sida mega patut mungkur pengawa ngemata proses pelin, ngaga pelin, ngemata ungkus, pengawa meri tender, nyiri penyanding penemu enggau konteriktor, pekara belanja enggau bejalaika projek nengeri sereta operasyen mayuh bengkah opis enggau ejensi,” ku iya.
Iya madah, kena Ogos tu tadi, iya kala ngasuh Kepala
Menteri berundingka pematut pengawa nyiri enggau pekara pinjau (secondment) pemesai integriti ukai ari SPRM diambi gawa dalam kaunsil engagu raban pengatur pengawa projek lalu nentuka pemujur projek ba nengeri tu.
“CeIO iya nya siku pemesai chukup latih sereta diakreditasi ngereja pengawa berat dalam sesebuah organisasi dikena nerenak ulah integriti enggau ulah ke mereti.
“Iya sigi dilatih ba pengawa ngatur integriti, langkar pengawa undang-undang ti diguna, sistem matau enggau angkun, nerenak ulah nulak pengawa nipu, makai suap enggau salah guna kuasa sereta ulih ngaga pelin pengawa integriti.
“Kebendar, menua tu udah numbuhka Opis Integriti enggau Pengawa Ngatur Menua (JITN) ungkup ngiring pengawa integriti ba opis menteri enggau ejensi taun 2012 ti ngemataka 20 CeIO ba SPRM diinjau ngagai (seconded) lalu dipadu ba mayuh opis menteri enggau ejensi dikena ngemata pengawa sida dalam munaska ulah makai suap enggau salah guna kuasa dalam opis perintah.
“Tang, pengawa nyiri enggau minjau pemesai nya enda lama aja, nengah iring perintah besai ke suba. Pengawa sida diketu sebedau pengawa bepilih besai abis,” ku See.
Sekumbang mai sida gawa ba timpuh ke enda lama, ku iya nya tentu bisi diasai bala CelO pasal ulah makai suap enggau salah guna kuasa lalu sida bejalaika pansik enggau enda bechiping tauka ngenang budi, lalu pengawa dikereja sida enggau peneka ati dalam mayuh opis perintah enggau ejensi, CelO tu mujur numbuhka orang nangi ngereja pengawa maia suap pengudah bisi dikaitka enggau sekeda kes makai suap ti besai.
Nya alai, iya andal pendiau nya mega diasai bala AG, begulai enggau SPRM, ba sida tentu nya enggai nyadi semina duduk aja ngemataka orang baum pasal kaunsil tender lalu nyadi terabai awakka ngintu pengawa sida ari dawa makai suap enggau ngatur menua. Tang sida deka meda pengasi ba semua pengawa dalam negi sereta namabahka agi intergriti, akauntabiliti, pengelurus enggau manah ngatur pengawa.
Berebak enggau nya, See minta sekali agi ngagai Kepala Menteri mandangka ulah nyadi ketuai iya ti manah lalu berengkah berandau enggau SPRM sereta AG nyiri CelCo ungkup mayuh opis perintah enggau tusun pengawa perintah nengeri.