Amanah Sarawak andal ulih menang ba DUN Demak Laut

KUCHING: Parti Amanah Negara (Amanah) Sarawak andal ulih menang ba penuduk Kunsil Nengeri (DUN) Demak Laut ba Pengawa Bepilih Besai Nengeri ke-12 (PRN12) tu ila.

Chairman iya Fidzuan Zaidi madah, bepelasarka penatai kaban baru parti enggau sukung ari peranak DUN Demak Laut, bisi jalai parti tu besemekih menang ba penuduk nya ba PRN ila.

Ku iya, ba PRN ke-12 ila, AMANAH deka bediri ba 13 penuduk nyengkaum Beting Maro, Demak Laut, Daro, Samariang, Gedong enggau sekeda sitak bukai.

“Insya Allah, kitai bela besampi awakka PRN ke deka diatur ila, parti kitai ulih menang ba penuduk Demak enggau semua penuduk ke dipekitka Pakatan Harapan,” ku iya maya bejadi penumbuh pampang baru ba Taman Mesra Bako enggau Kampung Tanjung Bako apin lama ke udah.

Pakatan Harapan iya nya gempung parti Amanah, Parti Keadilan Rakyat (PKR), Parti Pribumi Bersatu Malaysia (Bersatu) enggau Parti Tindakan Demokratik (DAP).

Fidzuan madah, dikena nyapai pemujur ba pengawa bepilih besai ila, semua kaban patut mandangka pengeransing enggau pengepuh besaup ngereja pengawa ngemujurka program parti ke diatur dudi hari.

“Aku ngarap bala kaban parti parti ulih bekerejasama enggau pangan diri lebih agi lmantu ngemujurka program ke deka diatur udah tu,” ku iya.

Berebak enggau nya, iya mega madah agi mayuh kaban baru deka direjister ba serata menua.

Naka tu ba DUN Demak Laut bisi nerima urung 4,000 kaban baru nyengkaum ari Kampung Semilang, Beradek, Hijrah, Bako, Gobil, Senari enggau Tabuan Melayu.

Bela datai Sekretari Unit Asatizah Amanah Sarawak, Ustaz Zulkarnain Suibun enggau Pemungkal Amanah Demak Laut Mohd Zen Peli.

Berebak enggau nya, Mohd Zen andal deka mayuh agi kaban baru ngerejister diri udah tu ila.

Kenu ku iya, naka diatu piak sida nerima mayuh pom minta nyadi kaban ari pampang Kampung Senari, Gobil, Sejingkat enggau Tabuan Melayu.

“Alhamdulillah, timbal chukup manah naka tu ba Demak Laut,” ku iya.