Anang muai uras sengapa enti enggai ‘angus’ RM500

SIBU: Enti enggai RM500 ‘angus’ pia aja, mensia mayuh dilalau anang muai uras sengaoa endur ba sitak dijaga Kaunsil Pelilih Menua Pesisir Sibu (MDLBS).

Chairman iya, Sempurai Petrus Ngelai madah, kelimpah ukum RM500, orang ke salah mega deka nerima ukum ke berat.

Iya madah, ulah muai uras sengapa endang siti penyalah ke tau dikompaun laban nya nyata udah ditulis dalam Undang-Undang Pemeresi.

“Ba MDLBS, kami deka nguna atur nitihka UndangUndang Pemeresi nyengkaum ngukum orang ke salah iya nya sida ti muai uras sengapa ba palan mensia mayuh.

“Kompaun minimum iya nya RM100 tang nay ulih ditiki maksimum RM500,” ku iya maya dirandau kemari.

Sempurai madah munyi nya lebuh ditanya sekalika MDLBS ngembuan sebarang perambu dikena ngukum orang ke muai uras sengapa ba sitak dijaga sida.

“Taja agi ulih jaga, kitai meseti ngajar mensia mayuh ngena chara ukum,” ku iya.

Nya alai, iya nesau mensia mayuh anang muai uras sengapa ba palan mensia mayuh enggau ba endur bukai, tang bela nyaga pemeresi.

Kelimpah nya, ba sitak Kaunsil Mengeri Sibu (MPS), penyampau kompaun udah ditiki ngagai RM500 ari RM20 kenyau 1 Julai 2017.

Sapit Chairman MPS Rogayah Jamain madah 760 notis kompaun udah dikeluar ngagai orang ke muai uras sengapa ungkup 10 bulan keterubah taun tu.

Kenu ku Rogayah, 32 peratus tauka 244 kompaun udah dibayar.