FTMRTT deka narit lebih 1,000 pesereta, temuai kena 14 enggau 15 Disember
MIRI: Lebih 1,000 pesereta enggau temuai dijangka deka datai dikena ngerichahka Festival Tanda enggau Muzik Rayat Tanah Tinggi (FTMRTT) Sarawak 2018 ti deka digaga di Long Bedian kena 14 enggau 15 Disember tu.
Chairman komiti pengatur ke mega Pemesai Pelilih Telang usan Tuan Baru Tai madah, sida ti datai iya nya peranak ari urung 20 buah genturung pendiau di kandang Long Bedian.
Ku iya madah, tetiap semilan etnik Orang Ulu deka dikangau mantaika tanda enggau muzik asal sida kelimpah sekeda pengawa pemerindang ari tetiap rumah panjai di kandang Long Bedian.
“Program tu berengkah kena malam 14 Disember lalu bisi ngayanka tanda tauka muzik asal ari palan pengatur program enggau rumah panjai di kandang menua nya. Nangkan ke nya bisi licha, pengawa pemandang, bejual sereta bisi mega main,”
“Tu lalu ditangkan enggau program ti pemadu dudi iya nya semua etnik deka mantaika tanda tauka muzik asal sida,” ku iya madah lebuh ti nyadi chairman Aum FTMRTT di Opis Residen Bagi Menua Miri, kemari.
Ku Baru nambah, komiti pengatur pengerami nya deka bepalan ba Opis Pelilih Mit Long Bedian.
Entara batang tuju pengerami tu iya nya ngidupka baru semua kereban muzik asal raban bansa ngambika enda punas lalu lenyau diserunyut jeman, ngerichahka aktiviti dagang temuai kelimpah ngelakuka seni muzik etnik ti lundai sereta nyelai nya.
Kelimpah ari nya mega deka narit raban nembiak rebak baru belajar sereta meretika lalu mega bemainka kereban muzik asal.
Penerang silik ulih betelefon ngagai Pemesai Administrasyen Sarawak ( SAO) Pelilih Mit Long Bedian Edwin Jelenggai (0198155463), Ketuai Kaum Leslie Lah ( 0138652215), Chaiman Komiti Renggat Genturung Pendiau Long Bedian Jok Eng Jok (0192695962) enggau Eric Anderias (0198679279).
Ku Jok madah, pengerami nya deka mantu ngelakuka aktiviti ti ulih mai temuai sereta pengusung datai ke pelilih Telang usan, ke lalu mega mantaika chara pengidup sida ngagai komuniti luar.
Ku iya, kelimpah muka awak ngagai peranak di kandang menua nya ngasaika asi dagang temuai nyengkaum ari suut perengka pengangkut, homestay, pemakai, ai irup sereta pengawa dagang asil pengeandik jari.
“Mayuh penyelai ti deka kami bantai dalam pengerami tu, tang ti paling manah iya nya peneleba ngasai kediri diau di homestay Orang Ulu, kelipah ulih meda kediri empu tanda, muzik enggau pengawa mantaika main asal etnik Orang ulu ke enda kala diayan ngagai mensia mayuh ngelamatu,” ku iya.
Dennis madah, entara etnik ti deka ngambi bagi dalam program nya Kenyah, Bisaya, Kayan, Penan, Kelabit, Lun Bawang, Berawan, Saban dan Lakiput.
Sama bisi datai maya aum pengari ejensi perintah di Long Lama, Sabah Sarawak Gas Pipeline (SSGP), pengari sekeda etnik Orang Ulu ari baruh Gempung Orang Ulu Malaysia (FORUM), SAO Edwin Jeleingai, Lah Anyie, enggau Anderias.