PEKEMA Sarawak udah meri bantu RM400,000 nengah program CSR
Yayasan Persatuan Pengimport dan Peniaga Kenderaan Melayu Malaysia ( PEKEMA) Pampang Sarawak udah meri bantu urung RM400,000 nengah program tanggungpengawa rama korporat (CSR) sepemanjai taun tu.
Tan Sri Abang Khalid Abang Marzuki ke nyadi presiden madah, pemeri nya nyengkaum mayar ungkus berubat enggau perubat, pesakit ti kurang penatai pemisi enggau ke kena penusah ngenyit kelimpah ari meri pemeri ngagai indai tunggal, orang seranta enggau ke tuju pelajar.
“Sepemanjai taun tu Januari ngagai Disember, kami udah meri pemeri sereta bantu urung sepenyampau RM400,000, lalu penyampau nya enda jauh bida enggau taun nyin kemari ( 2017).
Abang Khalid mansutka pekara nya maya bejaku ba ‘ Majlis Jamuan dan Penyampaian Sumbangan’ nyerumba pengerami mantar Krismas ba sebuah hotel ditu, kemari.
Ba pengerami nya iya meri pemeri duit enggau perais ngagai 100 iku penerima iya nya nembiak tu kurang penatai pemisi ari kandang mengeri tu.
Nambahka nya Yayasan PEKEMA Pampang Sarawak kemari mega meri pemeri sepenyampau RM5,000 ngagai 10 buah gerija ba kandang mengeri besai Kuching.
Abang Khalid madahka Yayasan PEKEMA seruran bebendar ngelala sereta semak enggau orang ti begunaka bantu sekalika orang sesiku, gerempung tauka gerempung pengintu pengelantang pendiau.
“Baka taun ke udah taja pan betapi enggau gaya ekonomi ti enda meruan, nya enda nagang kami ( Yayasan PEKEMA Pampang Sarawak) ari terus meri pemeri sereta bantu lebih agi ngagai sida ti amat begunaka.
“Tu aja mih chara kami meri pulai baru ngagai rmensia mayuh ti begunaka bantu sereta besai pengarap kami deka neruska aktiviti ti baka tu jemah ila,” ku iya.
Terang iya, program CSR ukai semina diatur maya musim pengerami tang Yayasan PEKEMA terus meri pemeri enggau bantu enda ngira maya.
“Kami PEKEMA Sarawak ukai semina deka ngemeran sereta nyulut dalam dagang automotif menua tang kam mega bisi juluk nyadi gerempung ti mayuh meri pemer ngagai rayat.
Sama bisi datai bini iya Puan Sri Lily Johari, Mandal Presiden PEKEMA Sarawak Tapah Ata, kaban komiti PEKEMA Pampang Sarawak enggau kaban kompeni PEKEMA Pampang Sarawak.