PKR Sarawak keranka Ali Biju dichiri nyadi mandal presiden
Parti Keadilan Rakyat (PKR) Sarawak keranka Kaban Parlimen (MP) Saratok Ali Biju dichiri nyadi mandal presiden parti dalam rintai ketuai tetinggi parti ungkup penggal 2018-2021.
“Tebal agi kami (bala ketuai pampang) dalam PKR Sarawak dekaka Ali Biju dichiri nyadi mandal presiden parti,” ku Chairman PKR Pampang Petra Jaya, Baharuddin Mokhsen.
Baharuddin madahka konstitusyen parti meri presiden kuasa nyiri lima iku kaban ngagai Kaunsil Ketuai Opis Besai, dua mandal chairman siku sekretari besai, siku ketuai pemadah, tukang wang enggau 14 iku chairman nengeri.
Ku Baharuddin, Ali udah nyata ngayanka penyulut dalam kapasiti iya nyadi MP, Kaban Kunsil Nengeri ( ADUN) enggau ketuai renggat baruh parti.
“Ali tu chukup bagas gawa, lalu iya ngelaban sebarang pekara ti tau nyadi dikena ngalahka chalun Barisan Nasional (BN) rambau pengawa bepilih besai tu tadi dikena ngerampas Saratok,” ku iya.
Baharuddin madahka parti bisi pekara baka ‘sempekat enda ditulis’ antara Sabah enggau Sarawak ke alai pengawa nyirika mandal presiden deka nitihka gintir antara dua nengeri.
“Penggal kepenudi, pangku pengawa diberi ngagai Sabah. Nya kebuah, penggal sekali tu patut diberi ngagai Sarawak, lalu kami ngasaika Ali Biju iya nya orang pemadu nemban dichiri nyadi mandal presiden,” ku iya nerang.
Baharuddin mega ngena awak nya meri pengaga ati ngagai Menteri Kereja Raya, Baru Bian ti udah dichiri nyadi Chairman PKR Sarawak ung- kup penggal keempat.
“Aku deka meri pengaga ati ngagai Baru Bian enggau ari penyulut iya, iya deka ulih ngemai PKR Sarawak ngagai tikas tinggi agi,” ku Baharuddin.
Rambau Kongress Nasiona PKR dalam pun bulan November, empat mandal presiden parti diundi iya nya MP Permatang Pauh, Nurul Izzah Anwar; Menteri Pengawa Berumah enggau Kaunsi Kandang Menua, Zuraida Kamaruddin; Menteri Ai Tanah enggau Pengeraja Asa Dr Xavier Jayakumar enggau ex-MP Batu, Tian Chua.
Presiden PKR, Datuk Ser Anwar Ibrahim bisi bejalai ngabas Sarawak kena Hari Lima tu tadi dikena iya nyukupka pejalai enggau bala ketuai ba nengeri enggau bagi menua sebedau nyiri 24 pangku pengawa dalam parti.