Palan paking kerita baru ba laman Rumah Suring diatu chukup lantang

Pengerami ngintu Krismas taun tu deka richah agi disambut peranak Rumah Suring Sana di Sungai Tulai, Bintangor bepun ari penembu palan paking kerita rumah panjai sida.

Projek tu endang dianti sida 37 pintu kenyau betaun-taun ke udah laban ngelama tu palan paking nyadi isu besai ngagai sida lebih agi maya hari besai baka Gawai, Krismas tauka kemisi ujung taun.

Ketegal nya, Tuai Rumah Suring beterima kasih ngagai perintah ti udah bejadika juluk ati sida serumah.

“Kami temegah ati laban perintah ngamatka semaya deka ngaga ke kami palan paking tu.

“Projek tu endang lama udah dianti kami serumah laban ngelama tu kami nyelepak endur rumah panjai orang bukai maya deka paking kerita,” pia k u iya maya berandau enggau pengarang berita, kemari.

Kelimpah ari nya, TR Suring mega andal projek nya deka ditangkir baru jemah ila ngambika disemin magang.

“Kami nemu projek tu mayuh bekenaka puku. Nya alai, ngarapka palan tu disemin magang nangkan ke tu ila taja pan nyangka digaga enggau chara pupuk,” ku iya madah baru.

Naka ke diatu enda semua palan nya disemin magang tang diaraka enggau batu.

Kelimpah digagaka palan paking, jematan kayu sebedau tu bela dirumpang lalu diganti enggau jalai semin ngelawa palan paking nya.

Taja pia, peranak rumah panjai nya udah chukup temegah ati enggau perintah ti udah ngamatka semaya bejadika juluk ati sida.

Ba taun 2016 suba, sida serumah bisi mantaika peminta sida nya ngagai Kaban Kunsil Nengeri (ADUN) Meradong Datuk Ding Kuong Hiing.

Ding mega maya nya besemaya deka nyaup sida serumah.

Ngelama tu sida serumah bekunsi endur paking kerita enggau rumah panjai sepiak sereta suah bendar enda chukup alai paking lebih agi maya ujung minggu tauka maya Hari Gawai enggau maya bisi pengerami ke bukai.