Peranak Uma Kulit chukup lama nganti rumah baru sida tembu
Sepenyampau 15 isi bilik ari Uma Kulit, Sungai Asap Belaga udah nganti lima taun pengelama mindah ngagai endur ti tau dikumbai sida rumah pengudah penusah angus siti luntang rumah panjai dalam bulan Febuari 2013.
Pengudah beberapa kali dilanjar ketegal penanggul ari raban kunteriktor ti seruran berubah, sida ngarapka diri ulih pindah ngagai rumah baru ti digaga di baruh Kaunsil Pengelikun Nasional Malaysia enda lama agi laban projek baru udah tembu.
Bekal ai enggau kuasa karan ngagai 15 unit udah disambung, tang sinu amat peranak dia tekenyit meda mayuh lot rusak enggau kereja digaga enda mantupka ati ba sekeda bagi unit nya.
Kaban Kunsil Nengeri (ADUN) Murum Kennedy Chukpai Ugon disempulang Pemesai Pelilih Belaga Juan Ubit apin lama ke udah bisi ngabas rumah panjai nya deka meresa naka ni projek nya udah digaga.
Bala sida dikelaluka Maren Uma Bujang Bit enggau sekeda peranak ti tasah lebuh ngabas rumah baru tembu nya.
Pengudah pejalai nya, Chukpai enggau peranak dia udah berandau lalu bejuraika bemacham isu ti mega bisi dibantai.
Chukpai lebuh dirandau pengudah randau nya madahka iya chukup sinu mega gaya penusah ditapi 15 isi bilik ti udah lenyau rumah enggau keresa ketegal penusah angus kena 10 Febuari 2013, urung 10.30 malam.
“Aku deka ngagihka geran RM200,000 di baruh Projek Transformasyen Menua Pesisir (RTP) ungkup taun baru (2019) dikena ngaga ruai ungkup 15 unit nya,” ku iya.
Seraya Juan ngelalau peranak dia ngerintaika semua pekara ti rusak ba unit sida empu laban nya agi di baruh timpuh liabiliti kunteriktor.
Rumah Panjai Uma Kulit iya nya sebuah ari mayuh rumah ti digaga endur ngempuruka peranak di Pelilih Belaga ti kena pangka pengawa ngaga Projek Hidroelekterik Bakun.