Subsidi minyak: PH patut berundingka pengelantang semua
Perintah Pakatan Harapan (PH) patut beratika baru pengawa meri subsidi minyak ti semina diberi ngagai entukar bekapasiti injin 1,500cc enggau ke baruh.
Kaban Kunsil Nengeri (ADUN) Telang Usan Dennis Ngau madahka tebal agi komuniti menua pesisir ba Sarawak ngena entukar 4WD ti ngembuan kapasiti injin atas 2,400cc, ukai ketegal sida beduit enggau tetangkupka rega nya tang ketegal peminta enggau gaya jalai batang ti semina ulih ditengah entukar bansa nya.
“Kebuah pia laban semina entukar bansa 4WD aja ti ulih ngerenchah jalai batang ba kandang menua pesisir nengeri tu. Sida nadai pilih bukai enggau beguna amat meli entukar 4WD ngembuan kapasiti injin 2,400cc enggau ke atas laban 90 peratus jalai menua pesisir di Baram iya nya jalai batang.”
“Nadai subsidi tu ukai semina deka nating pengempu entukar aja tang mega mangka bala penambang ba menua pesisir ti mayar rega tambang ti mar. Mayuh sida tu datai ari raban ti nadai penatai pemisi entap enggau seranta,” ku Dennis.
Iya mansutka jaku nya lebuh bejaku ba program ngerapitka kaul begulai nyerumba pengawa ngintu Taun Baru 2019 diatur Serakup Pengempu Entukar 4WD Telang Usan ( PPPERTU) ba sebuah hotel, malam ensanus.
Dennis ti mega penaung PPPERTU nambah, sebedau tu Menteri Wang Lim Guan Eng ba Belanjawan 2019 ngemendarka subsidi minyak semina diberi ngagai entukar bekapasiti enjin 1,500cc enggau ke baruh.
Iya nyemetak madahka tebal agi pengempu entikar di Baram ngena 4WD enggau kapasiti enda kurang ari 2,400cc.
Kelimpah ari dikena ngangkut barang dikena besehari sehari, pengempu 4WD ngena entukar nya begigaka belanja dikena nampung belanja ba menua ulu.
Kenu ku iya, bisi pengem- pu entukar 4WD ti meli minyak nadai subsidi nurunka rega tambang sida dikena ngurangka tating belanja penambang ti enda tetangkupka bayar tambang ti mar.
Berebak enggau nya ku Dennis, pengawa numbuhka PPPERTU endang patut dikena nyendiaka servis perengka pengangkut ti meruan ngagai kandang menua ulu Telang Usan.
“Chara deriba ba kandang menua Telang Usan enda sebaka enggau ba mengeri laban nengah jalai batang ti begunaka sekeda pengelandik enggau penyikar. Batang tuju PPPERTU iya nya nyendiaka perengka pengangkut ti nyamin pengelikun enggau tambang ti sebela ungkup semua pengempu 4WD.”
“Nengah pengawa nyemelaka rega tambang tu, kitai ngarap ulih nyeliahka penam- bang kelebih agi ari luar Telang Usan diasuh mayar rega tambang enda nitihka pematut.
“Pia mega nentuka sida ngena orang ti deriba ti endang amat landik deriba ngerenchah jalai batang Telang Usan,” ku Dennis.
Naka diatu sepenyampau 120 pengempu 4WD rejista di baruh PPPERTU.
Ba lansa bekaul, iya deka mantaika langgur penemu ngagai perintah nengeri dikena minta bantu pemeri tayar nadai bebayar ngagai bala kaban PPPERTU.
Dennis mega merambu ngagai Kaunsil Mengeri Miri ( MBM) nyendiaka endur paking khas ungkup bala kaban PPPERTU ngambika sida muntang dilawa orang tambang ti begunaka servis sida.
Berebak enggau nya, Dennis ngemendarka agih belanja penyampau RM10,000 dikena melanja aktiviti ninting taun serakup nya.
Sama datai Datuk Bandar Miri Adam Yii, Pemesai Pelilih Miri Abdul Aziz Mohd Yusuf, Sekretari Politik Kepala Menteri Charles Balas Seling, Chairman PPPERTU Kaunselor Jaraw Braim sereta bala kaban serakup bukai.