Beri peluang GPS ngemudi, negika hak Sarawak: Rundi
Rayat patut sedar sapa bagi raban ti ulih dikeandal meretika peminta, rurus gawaka pemansang nengeri tu
BINTULU: Menteri Bekal Ai enggau Elekterik Menua Pesisir, Dato Sri Dr Stephen Rundi Utom madahka Gabungan Parti Sarawak (GPS) patut diberi peluang ngemudika nengeri tu enggau nampung pengawa sida negika hak iya.
Ku iya, peranak Sarawak diatu patut sedar sapa bagi ti amat meretika peminta rayat enggau rurus negika hak sida.
Perintah Pakatan Harapan (PH) ku iya udah beberapa kali bebali jaku kandang beberapa bulan ke udah pasal semaya dibantai ba manifesto PH rambau pengawa bepilih besai tu tadi.
Rundi ti mega Kaban Kunsil Nengeri (ADUN) Kemena mansutka jaku tu lebuh bejadi pengawa ngelancharka projek bekal kuasa karan menua pesisir ba Rumah Dayong Sabot Sg Ipoh Labang KM60 Jalai Bintulu-Miri kena Hari Enam.
“Kitai udah nyemilik Barisan Nasional (BN) lebih ari 50 taun ke udah lalu dalam gempung tu, UMNO nyadi indu parti sereta dalam gempung demokratik, sida ti nyadi ‘indu’ semampai deka ba mua ba semua pengawa ngaga pemutus.
“BN alah bepilih besai Ke14, tang kitai di Sarawak agi kering, kitai udah berandauka pematut kitai ngira enggau nyaga diri empu, nyaga hak kitai ari gawa ngatika diri lalu nengah GPS, kitai ulih bediri atas kaki diri empu,” ku Rundi.
“
BN alah bepilih besai Ke-14, tang kitai di Sarawak agi kering, kitai udah berandauka pematut kitai ngira enggau nyaga diri empu, nyaga hak kitai ari gawa ngatika diri lalu nengah GPS, kitai ulih
” bediri atas kaki diri empu.
Dato Sri Dr Stephen Rundi Utom Menteri Bekal Ai enggau Elekterik Menua Pesisir
Iya mega ngelansa silik pasal ubah penemu deka dikena Kepala Menteri Datuk Patinggi Abang Johari Tun Openg kelebih agi sentang 5 peratus chukai jual produk petroleum.
Ku Rundi, tu hak ukai ulih dirunding nengeri lalu datai ba taun 2030, Perintah GPS dipelaba deka teulihka bebiliun ba penatai pemisi lalu tu deka dikena bejalaika projek pemansang kelebih agi ba kandang menua pesisir enggau kandang tebing tasik.
Iya madahka, beguna amat ngagai perintah nengeri di baruh GPS diberi mandat besai ari rayat laban hak nengeri deka terunjam enti PH megai nengeri tu laban sida ulih ngubah undang-undang enti sida bisi majoriti ba Parlimen.
“Anang alah ditipu jaku manis PH laban diatu kitai ulih meda sida suah bebali jaku. Pengudah menang, sida mar deka ngamatka semaya diri tang kitai ba GPS deka seruran fukus ba pekara pemansang rayat,” ku iya nambah.
Iya nyemetak madahka datai ba maya Sarawak diintu bela nyadi bakih kunsi dalam Malaysia lalu ukai baka nengeri bukai.
“Kitai enggai digaga baka ngaga nengeri bukai, kitai tu bakih ti begulai numbuhka Malaysia lalu tu maya peranak Sarawak nagih hak sida.
“Lebih 50 taun pengelama Sarawak nyadi sebuah ari nengeri pemadu kaya tang rayat agi seranta, nama kebuah kitai kaya tang kitai merinsa, diatu kitai udah chukup tuai runding nagih hak kitai lalu kitai patut begempung nuju pengawa tu,” ku Rundi.
Ba lansa bukai, Rundi mega ngansak bala ketuai komuniti enggau bala ketuai renggat baruh menua tu nyikap diri empu ngena penemu lalu deka teulihka pemujur patut bisi tuju enggau juluk, pekara tu beguna amat ngagai sida ngembuan penau nyadi ketuai ti bisi kualiti.
“Ketuai bisi kualiti tinggi ba renggat baruh beguna amat dikena nentuka genturung pendiau ulih diatur enggau lanchar lalu sida patut anang nangi nagih hak diri, chakah gawa, seruran betanya, giga peluang baru dikena ngangkatka kualiti idup nembiak redak sida,” ku iya.
Rundi mega ngingatka rayat ke alai nadai utai ulih ngubah idup sida kelimpah ari pengeran sida empu ngemeratka pelajar lalu semina tu aja jalai sida ulih berubah.
Iya mega minta rayat ngerebut awak disedia ungkup sida ari perintah nengeri dikena nyungkak tikas idup ari ngembuan penatai pemisi tegap.
Menteri enggau sida sebuat mega bisi bejalai ngabas Kampung Yoh Sebumbun Jaya Labang, Rumah Empaling Tuan Sg Labang enggau Rh Radin rambau pejalai gawa sehari nyentuk ngagai kandang menua Sebauh.
Rambau pejalai nya, Rundi ngemendarka geran belanja sepenyampau RM385,000 di baruh Projek Mit Pemansang Menua Pesisir (MRP) enggau Program Transformasyen Menua Pesisir (RTP) iya.
Ungkup Rh Dayong, iya ngemendarka geram MRP penyampau RM10,000 ngagai Komiti Pemansang enggau Pengelikun Genturung Pendiau (JKKK) iya, RM5,000 ungkup Biro Indu, RM40,000 dikena nyeleti rumah lalu RM15,000 dikena nangkir rumah.
Rundi ngagihka RM45,000 ti datai ari RM25,000 ungkup JKKK Kampung Yoh, RM10,000 ungkup Biro Indu enggau RM10,000 ungkup surau.
Rh Empaling diberi geran RM100,000 di baruh RTP dikena nyeleti rumah, RM30,000 ungkup JKKK enggau RM5,000 ngagai Biro Indu sereta bela penyampau mega diagih ngagai Rh Radin.
Sama nyempulang Rund rambau pejalai gawa iya nya empat Sekretari Politik Kepala Menteri Victor Temenggong Angang, Jenny Bangga, Petrus Igat Mathias enggau Romeo Christopher Tegong, Pemesai Pelilih Sebauh William Manggai, Penghulu Morshid Tali, Penghulu Lee Lei Seng Pemancha Limin Anai, bala ketuai opis perintah enggau ketuai komuniti bukai.