12 batang pekara chuan Indeks Nembiak Nengeri Sarawak
Pansik Bacha Penyulut tauka Indeks Nembiak Nengeri Sarawak ti disadang tembu Mei tu ila ulih nyadika chuan penerang ngagai raban nembiak ngelala bidang diselinting ti patut dikemanah dikena nentuka iya meri pangka positif ba tikas pemanah enggau pengidup raban nembiak ba nengeri tu.
Nitih ku penerang berita dikeluarka Palan Pemansik Pemansang Nembiak Malaysia (IYRES) madahka tuju pansik ti udah berengkah digaga bulan Ogos taun nyin tadi dikena ngelai tikas pemanah enggau pengelantang idup nembiak ba nengeri tu nyentuk renggat pelilih.
“Tu ngaul 12 batang pekara iya nya Pemansang Diri, Kaul Rama, Kelai Diri, Pengulih Diri, Pengerai, Pelajar, Ekonomi, Pengelikun, Kaul Rama Politik, Pengerembus Media, Jam Belepa sereta Gaya Ulah Devian.
“Penempa indeks tu deka meri lalau ngagai semua sida ti megai tuei nyengkaum pekereja nembiak ngambi ngelala bidang diselinting ti patut dikemanah nentuka iya meri pangka positif ngagai pemanah enggau pengidup nembiak ba nengeri Sarawak,” ku penerang nya.
Kelimpah ari nya, sida ti bisi pemerat ulih ngelangkar, ngelanggur sereta bejalaika program ti setipak belalauka asil ari Indeks Nembiak Sarawak tu ila.
“IYRES andal amat ari asil Indeks Nembiak Sarawak ulih nyadika pun pekara merambu bemacham program enggau aktiviti pemansang nembiak enggau engkeman sereta komprehensif agi ngaul pejalai ba renggat nengeri enggau mega pelilih menua ba Sarawak.
“Asil pansik ari IYRES tu dikearap ulih nambahka pemansang nembiak ari sukut nyendiaka kelai tikas dikena ngelaika ti meda tikas pemanah enggau pengelantang idup raban nembiak ba nengeri Sarawak,” ku iya.
Tambah mega tu ulih nyendiaka penerang dikena nempa tauka ngaga polisi pemansang nembiak kelebih agi ba renggat nengeri enggau pelilih menua ba Sarawak.
“Kelimpah ari nya, iya ngembing penempa pelin pengawa dikena nambahka tikas pemanah enggau pengelantang idup nembiak Sarawak.
“Ke bukai, meri penerang ngemansangka Polisi Nembiak Nengeri Sarawak enggau nyadi indikator dikena ngelaika penyapai Polisi Nembiak Malaysia (DBM),” ku penerang nya.
Sepenyampau 517 pembanci, empat pemesai penyelaras nengeri enggau 24 pemesai kaul pengawa bagi menua dikaul nyaup pejalai atur pengawa ngempung penerang.
Atur pengawa ngempung penerang digaga nengah sadung surat tanya pansik ngagai 13,870 responden nembiak Sarawak berumur antara 15 ngagai 30 taun mungkur 12 bagi menua enggau 31 pelilih selampur nengeri.
Pansik tu dipejalaika IYRES, sebuah ejensi di baruh Opis Menteri Nembiak enggau Lumba (KBS) enggau kerejasama Opis Menteri Dagang Temuai, Seni, Main Asal, Nembiak enggau Lumba Sarawak.