PSB Engkilili puang besai ditinggalka Kapitan Amin
Parti Sarawak Bersatu (PSB) Bagi Menua Engkilili puang ketegal pemidang ngenyit Kapitan Lim Siat Min tengahari, Hari Lima tu tadi.
Kaban Kunsil Nengeri (ADUN) Engkilili Dr Johnical Rayong Ngipa madahka pemidang niang pengerugi besai ngagai iya empu enggau kesemua raban PBS, ke alai emperian niang Kapitan Amin.
“Aku sinu amat sereta puang ditinggalka niang, tambah mega agi sinu ditinggalka menyadi aku, niang George Albert Ungang datai ba pengawa ngintu Taun Baru 2019.
“Sekali tu aku enggau PSB Engkilili diuji sekali agi, benung sida niang sebilik gagit ngintu Taun Baru China (TBC),” ku iya sinu.
Iya mega bisi datai meri basa kepenudi ngagai niang kemari, meri jaku peransang ngagai sida niang sebilik liat ati napi penguji nya.
“Nadai pekara patut dikes- inu, tejuka semengat niang diau lantang ba dunya sebayan. Besampika semengat niang diau likun begulai enggau orang ti kudus diberekat Tuhan,” ku iya.
Taja niang udah badu begulai negika pengawa nyempulang kitai, pengeran enggau penaluk ngagai parti ti sebedau tu dikelala enggau nama Parti Bersatu Rakyat (UPP) deka semampai dikenang bala bakih bukai lalu enda deka padam ngapa.
Ba lansa bukai, Chairman Serakup Tuai Rumah Engkilili, Tuai Rumah Johnson Damu sereta bakih niang, Melo Agan ti nyadi kaban Kaunsil Pelilih Lubok Antu, bela ngumbai pemidang niang Kapitan Amin, pemuang besai ngagai sida.
“Sebut aja nama program pengari rayat (Dr Rayong) kitai ba Engkilili, nadai kala ngelaung hari niang datai, kemerah amat ngaul komuniti Iban enggau Melayu.
“Kami mega nyamai ngatur pengawa enggau niang enti iya ngetuaika pengawa ti digulu YB Dr Rayong,” ku Melo.
“Kapitan Amin ulih dikeandal gawa ngetuaika program sereta naka ulih gawa begulai enggau kaban komiti ti dipadu iya nentuka pejalai program lanchar,” ku Johnson.
Berebak enggau, niang Kapitan Amin ti nyadi Chairman Serakup Billard/Snuker Daerah Engkilili kelimpah mangku bemacham pangku pengawa dalam serakup Hakka enggau China Engkilili madamka seput ba Klinik Engkilili pengudah luput.
Niang ninggalka siku balu enggau dua anak indu, udah ditumbak ngena adat ba Pendam China Mengeris, Engkilili.
Bela datai meri basa kepenudi ngagai niang bala bakih bukai baka bala kaunsilor, bala ketuai opis perintah ba Lubok Antu enggau Engkilili, kapitan, bala tuai rumah sereta bala bukai.