Wong: UPP nadai minta nyemilik GPS
Parti Rakyat Bersatu (UPP) nadai minta nyemilik Gabungan Parti Sarawak (GPS),pia ku presiden iya, Dato Sri Wong Soon Koh.
Iya madah ngagai pengarang berita pekara nya lebuh nerima penatai Tuai Megai Menua (TYT) Tun Pehin Sri Abdul Taib Mahmud enggau bini iya, Toh Puan Datuk Patinggi Ragad Kurdi Taib ba rumah iya ditu, kemari.
Ngelansa pasal pekara bukai, sapit iya, Datuk Dr Jerip Susil lebuh dirandau berebak enggau nya mega bela madahka sida enda minta nyemilik GPS laban peminta nama baru parti iya nya Parti Sarawak Bersatu ( PSB) apin dikemendarka Opis Pengerejister Gerempung (ROS).
Ditanya nyema UPP deka minta nyemilik GPS pengudah nama baru iya (PSB) dikemendarka ROS, Wong nyemetak madah, “Baka ti disebut aku, datai ba maya ila kitai deka ngaga pemutus laban tu ukai semina siti pemutus aja, tang tu ngaul antara pemutus Dr jerip enggau aku empu.
“Kitai patut nengah komiti besai partu lalu semua tu bisi atur pengawa sereta chara ngatur iya empu,” ku iya.
Fulu ari nya, Wong ti nyadi Menteri Dagang Antarabansa enggau E- Dagang enggau Menteri Wang Kedua, madahka sida diatu benung ngatur peminta ngagai ROS ngambi nyilih nama enggau lambang baru parti sida, iya nya PSB disempulang lambang baru.
“Aku ngarapka tu deka dikemendar sebarang bala berengkah ari diatu lalu pengudah dikemendar, kitai deka beratika pekara ti deka dikereja. Reti iya, pengudah datai ba penyangkai, kami deka ngelayang ke seberai,” ku iya nambah.
Ngenang pekara bukai, iya pechaya ekonomi nengeri deka bejalai lanchar.
Ku iya, seruran bisi mayuh projek dikemendarka Kepala Menteri Datuk Patinggi Abang Johari Tun Openg nunjukka ekonomi nengeri majak manah.
Apin lama ke udah, Presiden Parti Sa’Ati Rayat Sarawak (SUPP) Datuk Dr Sim Kui Hian madahka barang bagi parti ari Sarawak nyengkaum UPP ulih nganjung peminta nyemilik GPS, tang pekara tu ukai reti peminta sida ulih diterima enggau jampat.
GPS diatu diarika empat parti megai perintah ti ningkilka diri ari Barisan Nasional (BN).
Kelimpah ari SUPP, ke bukai iya nya Parti Pesaka Bumiputera Bersatu (PBB), Parti Rakyat Sarawak (PRS) enggau Parti Progresif Demokratik (PDP).
Sida numbuhka GPS kena 12 Jun taun nyin tadi pengudah BN alah ba Pengawa Bepilih Besai Ke-14 sebulan sebedau nya.
Pengudah beberapa bulan nganti, GPS udah dikemendar pengudah setipikit rejista dikeluarka Oois Menteri Dalam Menua kena 22 November taun nyin tadi.
Tiga hari sebedau nya, Menteri Dalam Menua, Tan Sri Muhyiddin Yassin udah madahka peminta GPS rejista udah dikemendar.
Logo dibantaika kena 9 Januari nyin tadi, ditangkanka enggau pengawa ngelanchar ba Kuching 10 hari udah nya.
Lebuh nerima penatai Tun Taib, Wong mantaika ngagai Taib penyelai ‘ Nian Gao’ (kek pulut) ke pemerat 25 kilogram digaga khas ungkup iya ( Wong) ari pengempu kilang biskut di Batu Kawah, Kuching.
Bela bisi nyempulang Tun Taib enggau bini iya, Sapit Kepala Menteri Datuk Amar Awang Tengah Ali Hassan, Menteri Muda E- Dagang ke lalu nyadi Menteri Muda Pemansang Dagang Mit enggau Jelan Pemesai ( PKS) Datuk Mohd Naroden Majais Menteri Muda Perengka Pengangkut Datuk Dr Jerip Susil Menteri Muda Pansik Sains enggau Teknologi Dr Annuar Rapa’ee, Residen Bagi Menua Sibu Charles Siaw sereta bala temuai dipebasa bukai.
Wong enggau bini iya, Datin Sri Pauline Leong sereta anak seduai, Dato Andrew Wong enggau sida sebilik bukai ngelalu penatai Tun Taib enggau bala bukai ba rumah sida.