Chong: Utang GST, penatai pemisi BN deka dibayar pulai

Asil chukai GST enggau chukai ari penatai pemisi ba penyampau RM37 bilion ke diutang perintah ke sebedau tu (Barisan Nasional) dipulai berengkah bulan Januari.

Sapit Menteri Dagang Dalam Menua enggau Pekara Bebeli Barang (KPDNHEP) Chong Chieng Jen madah pengawa mulaika duit nya deka diatur dalam timpuh 10 bulan.

“Tu siti berita ke manah ngagai kitai semua ba taun baru tu. RM37 bilion ti diutang perintah ke dulu deka dibayar pulai berengkah bulan Januari tu.

“Dalam timpuh 10 bulan, bayar tu deka ditembuka lelubah ke alai sekeda nya udah 3 nyentuk ngagai 4 taun enda dipulaika ngagai pemayar chukai,’ku iya.

Chong mansutka penerang nya ba aum pengarang berita pengudah ngulu pengawa ngelalu pengabang Parti Keadilan Rakyat(PKR) Sarawak ditu, kemari.

Iya ke mega Kaban Parlimen Stampin pechaya pengawa nya ila deka nyaup ngerembaika ekonomi dalam menua.

Dulu agi ari nya, Chong begulai enggau mensia mayuh berami ba pengawa ngelalu pengabang Taun Baru China 2019 di Indu Opis PKR Sarawak di Batu Tiga ditu.

Ngenang kaul bukai, Kaban Parlimen (MP) Puncak Borneo Willie Mongin minta rayat mengkang arapka perintah baru PH.

“Bisi didinga jaku nuduh PH enda ngamatka semaya, tang arapka rayat mengkang enggau perintah PH alai kitai sigi keran nangkup pinta enggau peneka rayat.

“Semua tu begunaka timpuh tang aku nyamin ulih dikemujur nengah polisi perintah ke diatu.

“Kitai mega udah minta perintah besai ngamatka pekara ke bekait enggau Sempekat Malaysia 1963,’ku Willie.