Jalai belakin ari Marudi ke Long Linei deka digaga enda lama agi

Menteri Muda Kaunsil Kandang Menua Datu Dr. Penguang Manggil madah jalai belakin ari Marudi ngelawa Long Linei deka digaga enda lama agi laban agih belanja penyampau RM40 juta udah ditemu lalu dipelanja perintah Gabungan Parti Sarawak (GPS).

Jalai pemanjai 7 km deka dibelakin nyadika pemungkal projek. Jalai deka meri penguntung ngagai beribu rayat nyengkaum raban bansa Iban ari Long Linei, tiga buah rumah panjai enggau Dusun ari Linei sereta mega bansa Kayan ari Long Panai, kesemua sida ngasaika pemaik jalai enti udah tembu jemah.

Datu Dr. Penguang ti mega Kaban Kunsil Nengeri (ADUN) Marudi mansutka jaku tu dibasa bejaku lebuh ngabang ngagai rumah ex-Ketuai Komuniti China, ex-Pemancha Wong Kiong Ching.

Kelimpah ari nya, mayuh projek benung diatur dalam pelin pemansang Marudi baka tebing sungai deka dipenyadika Kepala Menteri dalam bulan Mac deka datai enggau renggat kedua Industr Estet ti udah tembu digaga, pengawa ngemanah Fort Hose deka ditinda lalu projek ngaga penyapat tebing sungai udah berengkah digaga.

Antara rumah bisi digusung iya ba hari kedua ngintu Taun Baru China iya nya rumha Kapitan Chin Fung Yung, Kapitan William Lim, siku orang dagang benama Sim Kian Oh sereta bala bukai.

Sida ti bisi nyempulang iya ngabang Pemesai Pelilih Marudi Mackos Sibong Chairman Kaunsil Pelilih Marudi Edward Mendai enggau Penghulu Edrews Abdu Ghapar.