See: Penanggul peranak Malaysia ditan di Kemboja deka diputar Opis Menteri Luar

Opis Menteri Luar diatu kiruh mutarka isu ke bekaul enggau 47 iku peranak Malaysia, nyengkaum 44 iku peranak Sarawak ke benung ditan di rumah jil di menua Kemboja.

ADUN Batu Lintang, See Chee How madahka penerang tu dipansut Menteri Kereja Raya Baru Bian maya ke betemu enggau sekeda ari ruang bilik mansa ayah nengah chara dagang nya.

Ku iya tiga ruang bilik, dua ari bansa bidayuh enggau siti ari bansa Melayu bisi betemu enggau iya sereta Baru ba pengerami ngelalu pengabang Taun Baru China 2019 Parti Keadilan Rakyat(PKR) ditu, kemari,.

“Sida ngarika apai indai enggau menyadi orang ke ditan di Kemboja. Aku enggau Baru bisi bertemu enggau sida.

“Baru udah madah nyemetak ke alai Menteri Luar Datuk Saifuddin diatu benung kiruh mutarka isu nya.

“Kitai ngarap semua per- anak negeri tu pulai ke Sarawak enggau lengkas,” ku iya.

See nambah, Baru udah bejaku enggau Saifuddin ke alai menteri nya madah iya diatu benung mutarka isu nya.

Nitihka ripot sebengkah berita portal, Putrajaya udah nganjung surat diplomatik ngagai Opis Pekara Luar Kemboja enggau Opis Menteri Kerejasama Antarabansa ngambi ulih ngelepas 47 iku peranak Malaysia ke ditan di Banteay Mancheay, urung 400km ari Phnom Penh.

Opis Menteri Luar Malaysia nengah surat penerang berita madah surat diplomatik nya dianjung opis duta Malaysia di Kemboja.

Wisma Putera madah opis duta Malaysia di Phnom Penh semina dipadah polis Banteay Mancheay sentang pekara nya kena 28 Disember 2018, dua minggu pengudah sida ditangkap kena 11 Disember 2018.