Anang enda meri vaksin ngagai ukui ti diinang dikena nyeliahka penyakit rabies
Anang bedalihka pengawa ngintu pengerami hari besai nyadi ketegal enda ingatka tanggungpengawa meri vaksin ngagai ukui.
Datuk Bandar Adam Yii madah, nuchuk vaksin anti rabies meseti diberi ngagai jelu nya nyadi pekara ti keterubah ke patut dikemerat dikena nagang pengelekai igi penyakit tu.
“Anang kitai lalu enda kiruhka isu rabies maya kitai ti nyambut pengerami hari besai. Ngagai sida ti beempu ukui ke bedau meri vaksin ngagai jelu sida, sida patut lengkas ngadu pengawa nya,” ku Adam nerang kemari.
Kelimpah ari nuchuk vaksin, sama nyadi tanggungpengawa orang ti nginang jelu nya ngambika seruran nentuka ukui sida diau ba dalam kandang genturung pendiau sida.
Tu dikena nyeliahka jelu inang sida nya enda diserang ukui sigati ulih ngujungka ukui inang sida dirampit igi pnyakit rabies.
“Jadi mih orang ti nginang jelu ti siru sereta serurang kiruh. Sama kitai kitai nyadika Miri likun lalu enda ngembuan penyakit rabies,” ku Adam nerang.
Ku iya nambah, pengawa nuchuk vaksin anti rabies enda bebayar deka diatur kena Hari Minggu tu (10 Februari) ba Satadium Tertutup, Miri.
Program tu diatur Opis Vaterinar Sarawak berengkah ari pukul 9 pagi nyentuk 4 lemai.
Beserimbai enggau nya, Majlis Bandaraya Miri (MBM) udah nangkap 1933 iku ukui ti bekedayau semanjai taun siti nyin tadi dalam pengawa nagang pengelekai igi penyakit rabies ditu.
Operasyen nangkap ukui ti bekedayau nya digaga enda ngetu kenyau ari igi penyakit tu udah dituku ngelekai di Kuching kena bulan Julai 2017.
Ari bulan Julai nyentuk Disember 2017, MBM udah nangkap 461 iku ukui ke lalu nyadika penyampau ukui udah ditangkap kenyau ari igi penyakit rabies ditemu iya nya 2394 iku.
MBM bebendar ngatur pengawa nangkap ukui ti bekedayau sepengudah kandang menua tu dipadahka bisi ngembuan igi penyakit rabies ari Komiti Ngatur Penusah Ngenyit Sarawak kena 27 September nyin kemari.
Mensia mayuh ulih mantu raban ti bekaul ngeripot bekaul ukui ti bekedayau di kandang endur mensia mayuh nengah betelefon ngagai ‘hotline Whatsapp’ MBM ba lumur 0198960370.
Penerang silik bekaul pengawa nuchuk vaksin rabies sereta bakani ripot pemadu baru bekaul igi penyakit tu ulih ditemu nengah laman media rama ‘Facebook’ Sarawak Disaster Information.