Ngemeranka integriti ulih nentuka rampa menua beresi
Integriti enggau ulah ti ulih megai tanggungpengawa enggau manah ulih dikemeran nengah pemanah ulah ngintu pemeresi rampa menua.
Menteri Integriti enggau Ombudsman Datuk Talib Zulpilip madahka menua ti ngembuan integriti ke tinggi nyadi entara menua ti beresi lalu seruran nentuka pemeresi dijaga.
Rayat di menua tu sekalika tuai tauka biak enda muai uras sengapa endur lalu nyaga pemeresi rampa menua.
“Dalam konsep integriti bisi mega runding ke ulih megai tanggungpengawa enggau manah meresi sereta ngumpul uras ti bisi dipeda sida.
“Ulah ti suah muai uras sengapa endur ulih ngalitka parit lalu ngujungka penusah ampuh bah.
“Teruk agi nyema uras dibuai ke dalam sungai lalu deka munuh jelu tasik ti makai plastik ke dibuai,” ku iya.
Iya bejaku munyi nya lebuh ti ditemu ba Program Plogging Integriti ba laman Kunsil Nengeri (DUN) Lama ditu, kemari.
Program nya beserimbai enggau Majlis Amant Perdana Integriti 2019 (MAPI2019) ari Kepala Menteri Datuk Patinggi Abang Johari Tun Openg ba Palan Aum Penvies (PCC) kemari.
‘Plogging’ iya nya gempung aktiviti belanda tauka bejalai seraya ngumpul uras ti datai ari Jaku Sweden iya nya ‘plocka up’ ti mai reti ngumpul uras.
Program tu ti diatur Unit Integriti enggau Ombudsman, Opis Kepala Menteri, lalu program tu mega nerima kerejasama ari MAKSAK Sarawak enggau Dewan Bandaraya Kuching Utara (DBKU).
Program tu dikena nerenakka ulah ti ulih megai tanggungpengawa enggau manah dalam napi isu bekaul rampa menua lalu mega bejalaika gaya pengidup ti bepengerai.
Kelimpah ari nya, program nya mega dikearap ulih meransang runding ti ulih beintegriti lalu neguhka pun pemanah ulah dalam komuniti ba semua pekara pengidup.
Sekretari Perintah Nengeri Tan Sri Morshidi Abdul Ghani mega sama bisi enggau nyereta program tu begulai enggau urung 1,000 iku mensia mayuh ti datai ari staf perintah enggau komuniti ti bisi datai.