Taun Jani dikearap mai tuah ngagai ekonomi, dagang nengeri
Ulah bebasa enggau ngampunka pangan diri nadai ngira bansa enggau budaya patut diterenak dalam ati semua kitai.
Kaban Kunsil Nengeri (ADUN) Engkilili Dr Johnical Rayong Ngipa madahka penatai Taun Jani nitihka kalinda China dikearap meri tuah belipat enggau ngenegapka agi kaul antara pupu bansa ba nengeri tu, kelebih agi ba sitak Engkililili.
“Kitai chukup benasit, taja Engkilili tu kandang menua pesisir, tang pengidup tiga bansa besai, Iban, China enggau Melayu, ti nguan menua tu bela diau bebaik enggau pangan diri,” ku iya.
Dr Rayong mansutka jaku tu lebuh bejaku ba Pengawa Ngangkat Sumpah AJK Serakup Hakka Engkilili, Malam Lambaian Kasih Warga Emas enggau Pengerami Ngintu Taun Baru China 2019 ba Balai Mayuh Guna Engkilili, Engkilili malam kemari.
Ku iya, taja bansa China enda mayuh di Engkilili, tang semua peminta enggau peneka sida nadai kala dikelaung lalu diberi perati nitihka pematut.
“Enti bansa Iban diberi projek nengah MRP enggau RTP, aku enda kakang ati ngagihka geran enggau projek ti sama ngagai genturung pendiau China enggau Melayu laban semua kita tu pengundi enggau penyukung perintah di baruh pegai Kepala Menteri Datuk Amar Abang Johari Tun Openg,” ku iya.
Ngelansa silik, iya dekaka komuniti China ti datai ari raban bedagang ba Pasar Engkilili sabar ati napi penanggul ketegal ekonomi kusut kemaya hari.
“Diatu datai ba jam ti mar pengudah nadai mayuh komuniti di Engkilili kelebih agi komuniti Iban bebelika barang kelimpah barang di- guna ketegal rega utai tanam komoditi dunya labuh, baka getah, sawit, lada enggau koko, ngujungka sida ke pasar semina bisi kebuah aja.
“Nya alai, kitai besampi ngajihka Taun Jani 2019 tu meri penampak ba pengidup ti manah agi dibida taun ke udah lalu ekonomi kitai ditu majak ngerembai,” ku iya.
Pengerami nya mega richah enggau tanda singa, pemerin- dang ari bala artis ti dikangau ari Kuala Lumpur, pemer angpau ngagai sida ke tuai enggau chabut tikit benasit.
Dulu ari nya, Dr Rayong bis ngemendarka geran MRP bela penyampau RM5,000 ngaga Serakup Hakka Engkilili, Serakup Teochew Engkilili, SJKC Chung Hua sereta Kaban Komiti Serakup Hakka Engkilili penyampau RM4,500 dikena meli baju korporat.