Tujuh taun peranak Bidayuh nganti pala tanah dikeluar JTS

Tebal agi genturung pendiau Bidayuh apin teulihka pala tanah di baruh inisiatif sukat kelingi Tanah Adat Bansa Asal (NCR) ti dipejalaika Serakup Dayak Bidayuh Nasional (DBNA).

Nitih ku Temenggong Bidayuh Bagi Menua Kuching, Austin Dimin, kenyau ari tujuh taun ke udah, genturung pendiau Bidayuh udah nyukat kelingi tanah NCR sida empu lalu nganjung penerang ngagai Opis Tanah enggau Survey (JTS) nengah DBNA.

Taja pia ku iya, pengawa sida ti ngandalka diri teulihka pala tanah lalu bedau nyadi nyata nyentuk sehari tu.

“Naka diatu, mimit amat genturung pendiau Bidayuh ti bulih pala tanah di baruh sukat kelingi nya, ari lebih 400 genturung pendiau, enda datai 10 ti udah nerima iya,” ku iya lebuh dirandau kemari.

Austin madahka genturung pendiau ti udah nerima pala tanah tebal agi ari sitak Singai, Bau.

Tang ku iya, sebagi besai genturung pendiau Bidayuh ti apin bulih pala tanah, kebuah dipadah ngagai sida ketegal suntuk orang gawa ba JTS, nyengkaum penanggul suntuk belanja.

Nya kebuah iya ngarapka JTS ngerumban pengawa mutarka isu ngaul genturung pendiau Bidayuh tu laban sida udah kelalu lama nganti.

Ba lansa bukai, iya madah bisi mega beberapa genturung pendiau ti nadai penerang sukat kelingi tanah NCR ba JTS, antara iya Kampung Jambu di Pelilih Padawan.

Ari nya iya ngingatka bala ketuai genturung pendiau ngambika meresa baru penerang genturung pendiau sida empu nentuka iya bisi dalam rikod JTS.

Ba genturung pendiau Bidayuh, penerang sukat kelingi tanah NCR diserah ngagai DBNA, ngambi dibantai ngagai JTS ungkup atur pengawa ngeluarka pala tanah.