Peranak menua ulu patut sedar, meretika pengawa ditegi GPS

Gabungan Parti Sarawak (GPS) Zon 14 ba renggat baru mungkur sitak bepilih Mulu, Telang Usan enggau Marudi deka bebendar agi gawa nambahka pemereti ati enggau bisi penyedar ngagai rayat di menua ulu pasal gempung nya.

Ku Chairman ti mega Kaban Kunsil Nengeri ( ADUN) Mulu, Dato’ Gerawat Gala, tu nyengkaum ngaul semak rayat enggau bala pengundi ari meri pemerat ba serap endur tauka genturung pendiau ba sitak nya.

Ku Gerawat, rayat ba sitak menua ulu baka Mulu udah ngelala penemu ditegi enggau lambang Barisan Nasional ( BN), nya kebuah beguna amat ngasuh sida sedarka GPS tu gempung ti gawa negika hak rayat.

“Kitai dekaka rayat enggau pengundi di menua ulu nemu bali nama baru kitai, ukai BN, tang GPS. Nya kebuah semua renggat baruh nadai ngira parti komponen deka besaup ngelakuka nama GPS,” ku iya rambau aum pengarang berita pengudah ngetuaika Aum GPS Zon 14 begulai enggau Exco PBB Mulu di Palan Servis Komuniti DUN Mulu ditu kemari.

Iya madahka GPS ti datai ari parti menua tu iya nya Parti Pesaka Bumiputera Bersatu ( PBB), Parti Sa’ati Rayat Sarawak (SUPP), Parti Rakyat Sarawak (PRS) enggau Parti Demokratik Progresif (PDP) chara pemadu manah ngemai Sarawak maju ke mua ari sukut politik, pekara rama enggau ekonomi.

Ngelansa pasal aum nya, ku Gerawat antara batang aum sida nerang ngagai bala kaban di baruh sitak Mulu ke alai pengawa numbuhka GPS dikena nentuka Sarawak ulih bediri ngatika diri, badu agi diperekuh konsep ‘ sebulat suara’ tauka konsensus.”

Ku iya, aum nya berindik ari pengawa ngelancharka GPS ari Chairman ke lalu nyadi Kepala Menteri Datuk Patinggi Abang Johari Tun Openg kena 19 Jan tu tadi.

Seraya ba GPS Zon 14, pengawa ngelanchar disadang diatur ba sebuah hotel di Miri kena hari bulan ti deka diputuska ila.

“Kelimpah ari raban Nembiak, Indu enggau ranting PBB Mulu deka ngatur bemacham aktiviti dikena ngaul semak rayat enggau pengundi, sida mega deka nambahka penyampau tubuh bala kaban parti,” ku Gerawat.

Aum nya mega meri penerang ngagai bala Exco PBB Mulu sentang pengawa ditegika GPS dikena nentuka hak Sarawak dalam penumbuh Malaysia ulih dipulaika baru nitihka Sempekat Malaysia 1963 (MA63).

Kelimpah ari nya, penerang pasal signifikan di baruh Ejensi Pemansang Tanah Tingg Sarawak (HDA) sereta agih belanja penyampau RM1.5 biliun ti dikemendarka perintah Sarawak dikena bejalaika 43 pprojek infrastruktur dalam sitak Parlimen Baram ti mungkur Telang Usan enggau Mulu.

Projek tu mungkur jala alun (RM1,264.0 juta ari 21 projek), bekal ai (RM210.0 juta ari 20 projek), enggau bekal kuasa karan (RM25.6 juta ari dua projek).