Jerry mujur ngemansutka diri, lori tangki minyak angus lengis
Siku deriba lori tangki minyak mujur ngelarika diri ari retung diempa api ba penusah lori tangki minyak ti angus ba Kilometer 51, Jalai Persisiran Pantai MiriBintulu besemak enggau Kampung Pelapi Bekenu, pagi kemari.
Nitih ku penerang, deriba ti benama Jerry Jawa, 30, semina bakal mimit aja lalu udah ditaban ngagai Sepital Miri ngena ambulans raban Penyaga Pengelikun Mensia Mayuh Malaysia (APM) ngambika diperubat.
Ketuai Opis Pansik enggau Penerit Adat Trafik Sarawak Superintenden Alexson Naga Chabu madahka penusah nyadi urung pukul 8.30 pagi, ngaul sebuah lori tangki ti ngundan minyak Diesel enggau RON95 benung ba rantau jalai ari Bintulu ke Miri.
“Lebuh datai endur penusah nyadi, lori tangki nya dipelaba deriba enda tetagangka lori lalu tempawah ke kiba jalai sereta lungkup lalu ngempang jalai.
“Deriba nya mujur pansut ari lori lalu enda lama udah nya dipelaba bisi api mechik ari bateri lori nya ngujungka iya angus,” ku iya ba penerang berita kemari.
Alexson madahka penusah nya agi dipansik lalu dipansik di baruh Rule 10 LN 166/59.
Ba lansa bukai, seraban raban bomba ari Opis Bomba enggau Penyah Penusah (BBP) Miri lalu disaup BBP Lopeng enggau BBP Samalaju berumban ngesah ngagai endur penusah nya pengudah nerima kangau ngenyit urung pukul 8.33 pagi.
Ketuai Opis Bomba enggau Penyah Penusah Malaysia (JBPM) Zon 6 Miri, Penguasa Kanan Bomba I Law Poh Kiong madah penusah nya ngujungka lori tangki minyak ti ngundan minyak Diesel enggau RON95 angus lengis.
“Raban bomba ngena panchit pupu kelimpah ai dikena ngerara api.
“Api mujur dirara abis enggau bangkai lori tangki dikalih ke tisi jalai ngambika jalai ulih ditengah entukar,” ku iya seraya nambah, operasyen tembu urung pukul 11.45 pagi.