Peranak rumah panjai Pasai Siong lantang ati projek ngangkatmanah jalai dikemendarka
SIBU: Bepuluh taun pengelama nganti jalai diangkmanahka agi, peranak rumah panjai Pasai Siong diatu berasai lantang lebuh sada enggau peminta sida ngelama tu udah didinga perintah Gabungan Parti Sarawak (GPS).
Pengawa nasih tanah ngemanahka Jalai Pasai Siong udah dipenyadika Sapit Kepala Menteri ti mega Menteri Pemansang Infrastruktur enggau Perengka Pengangkut Tan Sri James Masing ba Rumah Layang Ngelai, Pasai Siong Ili Hari Enam nyin tadi
Tuai Rumah Layang lebuh madahka iya berasai gaga ati lalu meri terima kasih ketegal perintah GPs ti udah mendingka sebana sida ngelama tu.
“Penanggul kami ke diau ba Pasai Siong pengujung iya udah didinga sida GPS lalu kitai udah bepuluh-puluh taun minta peminta tu, bejaku senentang nya.
“Nengah pemisi jalai ke dibelakin, nya ngemudah sereta ngenyampatka agi pengawa kitai ti begunaka nya,” ku iya seraya ngenataika terima kasih ngagai Masing,Gira enggau Abang Johari ketegal ti udah ngemendarka projek nya.
Menijar Opis Kandang Tengah Opis Kereja Raya (JKR) Cassidy Morris madah, projek nya beungkus RM17 juta lalu 18 kilometer panjai enggau buka enam meter pemesai.
“Projek ngangkatmanah agi jalai belakin nya udah berengkah 5 April lalu dipelabaka tembu 4 Oktober 2020 ti deka digaga dalam timpuh 18 bulan,” ku iya.
Berebak enggau nya, Kaban Kunsil Nengeri (ADUN) Tamin Christopher Gira Sambang madah, projek dngangkatmanah jalai nya mega udah lama diperambu lalu suah dipejuraika ba Aum Kunsil Nengeri (DUN) lebih setaun ti udah.
“Nya alai, aku meri besai terima kasih ngagai perintah menua sereta Kepala Menteri Datuk Patinggi Abang Johari Tun Openg enggau Masing laban udah ngemendarka belanja dikena ngaga projek nya.
“Maya nya siap ila, nya deka meri pemaik enggau pengelantang ngagai 18 buah rumah panjai ti diuan urung 2000 peranak dia,”ku iya.
Ba pengerami nya mega, Masing mega ngemendarka belanja sepenyampau RM64,000 ngagai Rumah Layang ungkup projek nyambung leterik enggau RM5,000 ngagai biro indu rumah sida.
Bala ke bisi ngulu pengerami nya mega mujur ngumpu duit bantu sepenyampau RM2,6000 dikena mantu sida ke tasah angus ba Rumah Umpang ba Sungai Bauh Celum di Mukah.
Sama datai ex-ADUN Tamin Datuk Joseph Mauh Ikeh, Sekretari Politik Kepala Menteri Edwin Banta Pemesai Pelilih Menua Sibu Suhaili Mohamad, Pemesa Pelilih Menua Selangau Inting Nyami enggau bala tuai raban bansa ke bukai.