Besaup ngemansut Lubok Antu ari 10 pelilih menua pemadu seranta di Malaysia

LUBOK ANTU: Enda ngasuh kitai tekenyit ati ba kitai ti nemu gaya pendiau peranak di menua pesisir Sarawak ti seruran ngambi berat ba raban bansa di menua pesisir. Pansik Ke digaga Profesor Madya Madeline Berma ti mega orang ke ngaga pansik ekonomi ngenukuka pekara ke amat nyadi di menua pesisir.

Ari 10 pelilih menua ti pemadu seranta di Malaysia tujuh pelilih menua nya di Sarawak (Opis Statistik 2019), Lubok Antu siti pelilih ari tujuh pelilih menua ti pemadu seranta di Sarawak lalu 10 pelilih menua ti pemadu seranta di Malaysia. Enggau berunding positif aku ngaku fakta nya sigi amat lalu balat ngenyinuka ati, majoriti peranak di Lubok Antu nya bansa Iban.

Tu kelai ke nyata lalu udah datai ba maya iya peranak Lubok Antu enda ngira Iban, Melayu tauka China ke alai kitai sama patut berunding lalu nusun singkang pansut ari statistik 10 pelilih menua ti pemadu seranta di Malaysia.

Kitai patut meda ngagai pekara ke besai agi, lalu aku minta kitai semua enda ngira bagi kuing politik ngambika besaup ngemujurka pemansang di Lubok Antu ngambika Lubok Antu nadai agi ba dalam statistik 10 pelilih menua ti pemadu seranta di Malaysia.

Easter ngingatka kitai enda tau sekali putus pengarap laban nya bekaul enggau ikas pengarap ba jalai pengarap. Pelilih menua Lubok Antu udah lama nadai bulih pemansang tang kitai patut bediri enggau ngembuan pengarap ati ti baru, pemansang deka datai lalu gaya idup raban bansa deka manah agi.

Udah nyadi tanggung pengawa aku nyadi Kaban Parlimen Lubok Antu mai sada rayat Lubok Antu ti deka ke pemansang sebaka enggau pelilih menua bukai ti udah maju di Sarawak. Aku mega ngaga ke pemadu manah mai sada kitai semua ngagai pengawa bejurai ba Sidang Dewan Rakyat, kitai inginka pemansang infrastruktur, standard pelajar enggau pengelantang pendiau rayat Lubok Antu dikemeratka.

Pengerami nyambut Hari Easter ba St Philip Lubok Antu Hari Minggu 21 April 2019, bisi 200 iku orang ke diau ba Lubok Antu datai begulai sama enggau Kaban Parlimen Lubok Antu ngintu Hari Easter. Sida baka ke meda orang ke mai pemenang ba pengarap Kristian datai baru.

Ba pengerami nyambut Hari Easter ba St Philip Lubok Antu kemari, Jugah mega bisi meri bantu geran sepenyampau RM40,000 ngagai Gerija ST Philip, Gerija St Micheal Engkilili sepenyampau RM40,000, Lay Reader Fellowship RM20,000 enggau Main Fellowship RM5,000.

Pengerami Hari Easter 2019, mai penyerakup baru ngagai rayat Lubok Antu.

NGERAMI: Bala ke bisi datai ngulu pengerami nya.

BEJADI: Jugah melah kek kelai bejadi Pengerami Ngintu Hari Easter Gerija St Philip, disempulang bala bukai.

NIBARKA JAKU LALAU: Jugah dipebasa meri jaku tangkan ba pengerami nya.

SELAMAT DATAI: Penatai Jugah ngagai pengerami nyambut Hari Easter nya disambut ngena basa.

SAMA NUJU PEMANSANG: Jugah ngelalau peranak Lubok Antu ngambika sama besaup enggau iya ngemansangka sitak nya.