12 buah rumah panjai di Ulu Entabai deka disambung enggau jalai alun
JULAU: Bisi 12 buah rumah panjai ba Ulu Entabai deka disambung enggau jalai alun ke udah dibelakin enda lama agi.
Lima buah rumah panjai deka disambung enggau jalai alun taun baru, sepenembu projek jalai alun ba fasa keterubah, padah Kaban Kunsil Nengeri Meluan, Rolland Duat.
Iya madah munyi nya lebuh pengawa kimpin pemesai begulai enggau mensia mayuh sebedau iya bejadika pengawa nasih tanah ba fasa ba projek ngaga jalai alun ke diatur ba Rumah Sang, Rantau Chire, Ulu Entabai ba ditu kemari.
“Renggat ti keterubah nyengkaum ngaga jalai alun 10 kilometer pemanjai ari Rumah Sang nyentuk ke ngagai Rumah Nyalin beungkus RM21 juta,” ku iya seraya nambah, nya dipelaba deka tembu digaga dalam 18 bulan ti deka datai tauka Disember taun nyin ila.
Ku iya madah, projek nya diberi perintah nengeri Sarawak, lalu nandu madahka iya mega udah minta agih belanja dikena ngaga jalai alun bisi 12 kilometer pemanjai ke berengkah ari Rumah Nyalin ngagai Rumah Jali (Rumah Jalong) di Sekerak ba renggat ti kedua lalu dipelabaka beungkus RM30 juta.
“Maya renggat ti kedua dikereja lalu bisi tujuh buah rumah panjai ba Ulu Entabai deka disambung enggau jalai alun ke dibelakin,” ku iya nambah.
Taja pia, projek jalai alun nya deka tembu digaga dalam timpuh 18 bulan, lalu iya bisi dipadahka bala kunteriktor iya nya projek jalai nya deka dipelaba tembu nitihka timpuh nya enti nadai penanggul baka gaya hari ti enda manah lalu pia mega nyema bala peranak dia bisi nagang.
Rolland mega bisi ngelalu ngagai sida ke diau ba dia ngambika sama bela bekerejasama dikena nentuka projek nya bejalai enggau lanchar lalu tembu nitih ke timpuh ti udah ditetapka.
Iya ngarapka peranak diau dia nerima enggau ati gaga ari perintah nengeri kelebih agi Gabungan Parti Sarawak (GPS)-ketegal meri pemansang ngagai sida ba genturung pendiau dia taja pan nadai ditulung ari perintah besai.
Iya madahka mayuh agi projek deka diberi perintah nengeri GPS lalu udah ngaga pemutus ngena belanja ar wang turu ti udah dikumpu ari mayuh macham asil penatai baka ari asil kayu batang chukai dagang minyak dikena ngemanahka agi kualiti idup mensia mayuh.
Projek besai jalai alun belakin deka digaga ba Meluan nyentuk ngagai Rantau Limau beungkus RM216 juta lalu udah dikemendarka.
Iya ngujungka jaku madah Projek Pemansang Menua Pesisir (RTP) deka nyendia enggau lengkas infrastruktur ti endang diguna baka jematan jalai batu enggau sistem beka ai graviti.
Pengari ari Opis Pelilih Mit Pakan, SAO Yalin Asan enggau sekeda tuai kominiti mega bisi ngenataika jaku lebuh maya pengawa nya.