Clarence Ting dikearap terus komited bejalaika pengawa ngemansangka SMC
SIBU: Kaban Parlimen (MP) Sibu Oscar Ling ngarapka Chairman baru Opis Kaunsil Mengeri Sibu (SMC) Clarence Ting neruska pengawa sereta bejalaika tanggungpengawa ngatur SMC ngagai jalai pemansang ti nyulut.
Ku iya, pengawa deka mai SMC terus nyulut iya nya tanggungpengawa ti enchabar dalam bejalaika servis mengeri ke pemadu manah ngagai mensia mayuh.
“Keterubah nya, aku meri puji ngagai iya (Clarence Ting) ketegal udah dichiri nyadi chairman SMC ti baru.
“Tanggungpengawa nyadi ketuai ke megai SMC iya nya endang mayuh penguji laban nangkup peminta enggau kedeka rayat.
“Taja pia, aku pechaya Clarence bisi peneleba ke besai laban iya ukai orang baru enggau Opis Kaunsil Kandang Menua (PBT) laban kala mangku pengawa nyadi ex- sapit chairman Opis Pelilih Menua Pesisir Sibu (SRDC),” ku iya lebuh dikerandau kemari.
Berebak enggau nya, Chairman SRDC Sempurai Petrus Ngelai maya dikerandau kamari mega meri puji ngagai Ting laban ti udah dichiri megai pangku pengawa nya.
“Nya pilih ti engkeman nyadi ketuai SMC enti dipansik bepelasarka peneleba iya ti besai nyadi ex-chairmain SRDC lalu diatu chairman Opis Kaunsil Palan Penyangkai Rejang.
“Nengah pemisi peneleba begulai enggau PBT sereta ba palan penyangkai, aku pechaya iya ulih bejalaika tanggungpengawa iya nyadi chairman SMC,” ku iya.
Ku iya nambah, nyadi chairman SRDC, iya ngarap sida ulih bekerejasama enggau rat dalam meri servis pemadu manah ngagai rayat ba sitak sida empu.
Kemari Kepala Menteri Datuk Patinggi Abang Johari Tun Openg udah madah pengawa nyiri Ting nyadi chairman SMC ke baru dikena nganti Datuk Tiong Thai King.
Iya mega datai ari Universiti York, Toronto, Kanada pengudah sekula keterubah di Sekula Sekondari (SMK) Methodist.
Ting aktif ngambi bagi ba dalam Gerempung Ukai Dikuasa Perintah (NGO) nyengkaum kaban opis Direktor SMK Kwong Hua.
Dalam politik, iya nyadi kaban Parti Sa’ati Rayat Sarawak (SUPP) kena 1980an lalu maya nya iya chairman SUPP pampang Pelawan.