Beratika sensitiviti apai indai sebedau ngempung sekula di Subis
MIRI: Sensitiviti apai indai patut diperatika sebedau bejalaika atur ngempung sekula di kandang menua Subis.
Kaban Parlimen Sibuti Lukanisman Awang Sauni madah, bisi rintai nama sekula ti diperambu deka disegulaika enda disetuju api indai enggau iya empu.
“Kitai enda patut gagit ati deka ngempung semua sekula di Subis laban kitai patut nemu peranak nguan kandang menua nya deka nambah ari taun siti ngagai taun siti lalu kitai patut belematika ukai semina ditatak ngagai timpuh lima taun tang beratika timpuh ke panjai agi.
Aku ngelalau PPD (Opis Pelajar Pelilih Menua) ngambika bejejimat dalam perambu ti deka ngempung sekula laban kitai beratika sensitiviti apai indai,” ku iya.
Iya madah bakanya ba program ngintu Hari Pengajar renggat Pelilih Menua Subis ti berambaika jaku ‘Guru, Obor Hemah Menyinari Pertiwi’ bepalan di hotel Pullman kemari.
Lukanisman madah, pengawa ti deka bejalaika atur nya mega patut beratika konteks ke diguna enggau setipak ba sesebuah kandang endur.
Pengawa ti deka ngempung sekal ti mai sebuah kandang menua ngembuan sebuah sekula ti besai agi ti nyendiaka gaya pelajar ti kondusif agi.
Iya enggai meda gaya belajar ke alai nembiak sekula primari satu enggau primari dua disegulaika ba jeman 21 tu.
“Dia meh tanggungpengawa pengajar nerangka ngagai apai indai batang tuju ngempung sekula ngambika nembiak sekula bulih pelajar ti kondusif,” ku iya nerang.
Lukanisman mega beratka isu sekula repuk, rumah pengajar ti jai enggau kurang pengajar di Subis.
Ungkup sekula repuk, iya ngarapka mayuh agi agih belanja diungkupka dikena tuju ngangkatka manah enggau ngaga sekula baru.
Iya mega deka bejuraika isu rumah pengajar ba jurai belanja kena bulan Oktober ti deka datai ngambi diperatika perintah besai.
PPD Subis mega begunaka begunan baru enggau moden dikena nentuka atur pengawa enggau nyamai ngambika sida ngelanggur pengawa kereja enggau polisi ngagai pengajar di kandang pelilih menua Subis.
Ba program nya, Lukanisman mega bisi ngemendarka agih belanja sepenyampau RM10,000 dikena bejalaika aktiviti nyambut Hari Pengajar PPD Subis taun tu.
Penyampau geran ke sama bega dikemendarka iya umgkup tabung ngintu pengerami Hari Pengajar ungkup taun ti deka datai.
Sama bisi datai ngulu program nya Pemesai Pelajar Pelilih Menua Subis, Seripah Azizah Wan Hussain.